كاتب وروائي مصري معارض لمحمد مرسي يعقد مقارنة بين مصر زمن مرسي ومصر زمن السيسي


July 31 2016 10:38

عرب تايمز - خاص

نشر الكاتب والروائي المصري محمد الجيزاوي تدوينة على صفحته بموقع التواصل الإجتماعي "فيس بوك"  عقد فيها مقارنة بين مصر في عهد مرسي ومصر في عهد السيسي ... والجيزاوي كان من المعارضين لمحمد مرسي وهنا تكمن طرافة المقارنة التي عقدها حيث كتب يقول


"أنا بعتبر أن الإخوان خصومى السياسيين طول عمرى واللى متابعنى من زمان يعرف دة واللى قرأ روايتى "الخمر ماعادت تسكر أحدا "يعرف دة


لكن دة لايمنعنا من الإنصاف


الاخوان فى السنة اللى حكموها وصل سقف الحريات لأعلى مستوى فى تاريخنا يا أخى دة أى اعلامى وسخ كان بيطلع يلعن سلسفين مرسى ومحدش يقوله انت رايح فين .. بينما السيسى قفل برنامج باسم يوسف وسرح يسرى فودة وكل صوت معارض ومبقاش موجود غير قوادين على شاكلة خيرى رمضان واحمد موسى ولميس وشلة النعاج الاعلامية .

- مرسى كان لو واحد مراته زودت الملح فى الأكل كان ينزل يعتصم فى التحرير ويقفل الشوارع ومع ذلك محدش انضربت عليه رصاصة وفى خلال السنة وفى اعتى الاشتباكات لم يقتل أحد وعلى أقصى تقدير اللى ماتوا لايتجاوزوا اصابع اليد الواحدة عددا بينما السيسى صباح الخير بتاعته بتبقى مجزرة يموت فيها المئات .

- مرسى حصل فى عهدة عملية أو اتنيين ارهابيتين لا أكثر بينما البرنس السيسى الجيش المصرى قرب يخلص على ايد الارهابيين .

- مرسى اللى قلنا عليه رئيس ضعيف كانت الدول بتعمل حسابه واسرائيل وقفت ضرب غزة بعد كلمة منه بينما السيسى الرئيس القوى الملك عبد الله استخسر ينزل من الطيارة وبعتله يجيله لحد طيارته ويقغد على كرسى الحمام قدامه بعد ماباس راسه

- مرسى كانت كل دول الخليج مش عاوزاه باستثناء قطر والاضرابات فى كل مكان والمؤسسات الرسمية بتتآمر عليه ومع ذلك الدولار مزادش ولا حتى ربع جنيه بينما السيسى كل دول الخليج بتديله مليارات وكل مؤسسات الدولة بتلحس جزمته ومع ذلك الدولار تجاوز 12 جنيه .

- فى عهد مرسى كل المرتبات بلا استثناء زادت سواء القضاة أو اساتذة الجامعة أو المعلمين أو الاطباء أو حتى الشرطة . فى عهد السيسى الناس بتاخد بالجزمة ومحدش بيزيد قرش واللى يتكلم يتهموه انه اخوان ويتسرح من وظيفته وكلاب الاعلام يقولوا الناس لاااازم تستحمل واللى حطو فلوسهم فى القناة الجديدة قالولهم امك فى العش ولا طارت ومع الضنك العام كل يووووم الجيش والشرطة والقضاء مرتباتهم بتزيد وباقى الناس بتسف تراب

- فى عهد مرسى كنا بنعترض ان دجالين القنوات الدينية بيقولو عليه رجل صالح .. انما انهاردة دجالين الازهر بيقولوا عليه انه نبى الله موسى وانه مفوض السماء وسكرتير البابا فى الكنيسة قال ان شاف يسوع المسيح داخل جنب السيسى .. ومحدش قالهم بلاش دجل ولعب على اوتار الدين ولا شفنا اعلامى واااحد اعترض

- فى عهد مرسى الرئيس بنفسه راح جاب البنت الصحفية من السودان لما اختطفوها وجابها على طيارته وفى عهد السيسى احنا بنتخطف من بيوتنا والمصريين بيتداس عليهم بالعربيات فى الكويت وبينضربو بالكرباج من الكفيل ومحدش حتى فى القنصليات بيتحرك فضلا عن الخارجية والرئاسة

- مرسى فى السنة اللى قضاها ورغم تلفيق الف الف قضية للاخوان لكن مفيش كلب جرؤ يقول ان مرسى او أى وزير فى حكومته سرقوا جنيه واااااحد ومعليهمش ولا قضية فساد بينما السيسى كله رجالته شيوخ منصر والفساد بقى للركب ومحدش عارف المليارات دى كلها بتروح فين

- مرسى رغم كل الضغوط اللى كانت عليه لكن كان بيطور وفى مشاريع حقيقية واسعار السلع كلها كانت معقولة جدا وفاكهة زى المانجة وصلت اربعة جنيه بينما السيسى بملياراته اللى شحتها من الخليج واللى تجاوزت 80 مليار غير التبرعات الداخلية غير الهدوء اللى فى البلد ومع ذلك سعر كيلو الليمون وصل اربعين جنيه والبانية 80 جنيه وكل يوم فى زيادة اسعار بشكل جنونى والبلد فلست ومبقاش عندنا دولار واحد يغطينا فى البنك المركزى والبلد قلعت مللللللللط بكل معانى الكلمة

- ايام مرسى كنت ممكن اكتب بوست زى دة اهاجمه فيه وبعدها اروح اقعد ع القهوة واشيش واضحك واروح انام وانا فى بطنى بطيخة صيفى انما دلوقتى فى عهد السيسى بكتب كل كلمة وبعدها بقول "اللهم إنى استودعك زوجتى وابنائى "

 









Loading...




Home Page
كتب ممنوعة
اراء حرة
صورة وتعليق
اخبار طازة
برقيات عاجلة
شروط النشر
فضائح وفضائح
خبر وتعليق
سري جدا
لصوص ظرفاء
رسائل القراء
من ارشيفنا
هذا الرجل
هذه المرأة
كتاب البورتل
كاتب وكتاب
قصائد ممنوعة
 مقالات  مميزة
كتب للبيع
ارشيف الاخبار
قصائد المقدسي
صحف عربية
الافتتاحيات
مقالات ساخنة
صبرا وشاتيلا
أسامة فوزي
ملفات الفساد
 مقالات الاولى
الكتب السعودية