ابراهيم بلة
abilleh@yahoo.com
Blog Contributor since:
14 September 2010



Arab Times Blogs
تعابير
تعابير




يا محلى وجودِك في الدار
أُنس وحنيّة وأزهار
صبحية منسمع ألحان
وليلية منكتب أشعار
ربك بس بيعرف ليش
حبك قدره بالقنطار

العيد تعلم بسماتِك
وبسمة خدك خمس أقمار 
نسماتك من لون جديد
بتحرق قلبي مثل النار
بقربك روحي بتدفى كثير
وقلبي بيضحك ليل انهار

يا محلى وجودك في الدار
سعد وبسط وعز وغار
أنتِ الدنيا وقربك كيف
وفيك الدنيا والأنوار
انت الجنة وزهر الصيف
وعطرك فايق عالازهار

ما أغلى وجودك عندي 
وبلاكِ الدنيا أصفار
لا في شرق ولا في غرب
ولا الشمس بتشرق بنهار
على بعدك ضاعوا الأنغام
وانا وحدي عايش محتار

من دونك أيامي قلال
وقلبي دقاته بتنهار
أوجاعي بتزيد كتير
وبستنى منك اخبار
كل ساعة بَعِد الدقات
ودقات الساعة شو كتار

أنا بكره بُعدك عني
على بُعدك دمعي بينهار
نسيت البسمة والأفراح
كرهت الدنيا والمشوار
بسأل نفسي عايش ليش
رحمة ربك يا ستار

قلبي من غيرك محروم
متعذب وجروحه كبار
بتمنى ما تغيبي يوم
لكن هالدنيا دوار
لما تعودي بتشفي جروح
بيطول عمري .. بتحلى الدار

صورة وجهك ما بتغيب
عن عيني ليل ولا نهار
وحبك غالي عندي كتير
وأطيب من لحن الأطيار
وجودك اجمل ما في الكون
وغيرك جنبي ما بختار




ابراهيم البلة






تصميم عرب تايمز .... جميع الحقوق محفوظة
المقالات المنشورة ارسلت الى عرب تايمز من قبل الكاتب وهي تعبر عن رأي الكاتب ولا تعبر بالضرورة عن رأي عرب تايمز