توفيق الحاج
tawfiq51@hotmail.com
Blog Contributor since:
26 February 2007

 More articles 


Arab Times Blogs
مني السلام...................!!

*(القيت في حفل تأبين المرحوم موسى سابا يوم السبت 9/4/2016) ابو عيسى.. مني السلام ولك السلام وعليك السلام موسى زي عيسى زي عبد السلام انت اخويا..ابن امي وابويا عايش معايا ..في وجهي وقفايا وكلنا حكاية اسمها الوطن..!! ...... ربنا خلقنا من طينة حنينه وصرنا بشر وشاء انو نبقى في غزة المدينة..وشاء القدر من يوم مانولدنا...لحد الكفن.... نلاقي في حياتنا ..ناس بسمة حلوة ..و رنة وتر وناس شر تجرح..وناس في الخطر وكوم بدو يعمر..وكلنا ف سفر ............. لقينا ف حياتنا... راجل ..هيك الله بخلق شهامة ومروءة ..وبكل الصور.. كان ابو عيسى..شايب زي حالاتي..لكنه شباب ترنقه.. وبوته..ضحكاته ..وصوته بيقولي سابقني اذا فيك مراجل ورد الجواب.. اضحك واقوله: ياعم انت رياضي .. وانا عظمي فاضي وايش جاب لجاب..؟!! ...........

ازكر يوم احتضنا..وعاش في زمنا.. في وقت تخلى عنا .. بعيد وقريب قال :ياااولاد..عيسى ابني منكو... عيسى ابني معكو.. والجمعية بيتكو..وما في حد غريب لكن العجيب..... اني مكنتش اعرف ان الحاج موسى.. من يومه فدائي وبماضي رهيب معقوووول ؟!! شكله مكنش يوحي... تحس انه تاجر..او هيئة طبيب..!! ........... ازكر مرة ثانية..جاب النا كنافة.. لا الها مناسبة.. ولا في صحافة قسمها ووزع ع كل الحبايب .. ولما كنت غايب.. وجيت له حبيب اعطاني منابه..كأنه ابويا.. وصاحبي واخويا ولا اني اخيب.......................!! ...........

لاتقولوا مسيحي.. ولاتقولو مسلم قولو خلقة الله..وتصنيفنا مؤلم .. اساس الفتن ايش يعني سني؟؟؟ ايش يعني شيعي؟؟؟؟ وواحد نبينا ع مر الزمن ايش ارثوذكسى..؟؟؟ ايش كاثوليك ؟؟؟ ماهو اخويا... وهو اخيك ودين ابن مريم ما بيعرف وثن اولاد عيسى منا واحنا برضو منهم عاشو العمر بينا..وعشنا العمر معهم اصحاب وحبايب.. وكنا نسايب واهل الكتاب .... ربنا ونبينا وصونا عليهم وفاروقنا عمر..صلى بين ايديهم يعني.. بيكفينا منهم ..امنا ماريا...وملك الحبشة وعيسى الغواص.. وجورجي زيدان وانطون سعادة وميشيل عفلق.. وحكيمنا العنيد.... بيكفينا فيهم..هلايورن كبوشي وكمال ناصرو مانويل مسلم وادوراد سعيد وما بننسى دمنا ودمهم والترزي الشهيد...!!

ورغم هيك ..يطلعلك أناني وحاقد بليد يقول هذا صفته.. ويقول هذا نعته.... بكلامه المضلل وامره الغريب..... بدال ايش عملنا؟؟ ووين راح أملنا؟؟؟؟ بدال الرب واحد.. وكمان الهم واحد... وغزة بتصرخ.. ومافي حد مجيب....!!

..................... ابوعيسى... راجل منا فينا..ناضل وانسجن عاش زينا زيه..في اعتى المحن عاش ويا حيدر..وقادة الانتفاضة كان هانا جامعهم..والسر ف مخاضة.. والسر انعلن........ اتجرجر أبونا.. ويهود بهدلونا... وكان كل عذابه ..لاجلك ياوطن............. كان ابونا موسى..صورة من قريب ..لانسان حبيب جمع الله فيها هلال وصليب..!!

...... ابو عيسى رحلة عمر...هم وصبر...اعطى ما جمع السبع البداية .. وعزة الوجع....!! واليوم ..افتقدنا..ريحانة بلدنا... والفراق صعيب لكن هيك قدرنا.. ماينفع بكانا ولا مر اسانا..في موكب مهيب ملناش الا ندعي..وربنا مجيب رحمن.. يااارحيم................. الله يرحم امه ..وابوه وعمه.. والتراب اللي لمه والخير اللي كان في ايده وتمه الله يغفر النا..واحنا كل همه ويجمعنا معاه في اليوم العظيم... ............... ابو عيسى............

مني السلام ..ولك السلام ..

وعليك السلام موسى زي عيسى زي عبد السلام...... ......................







تصميم عرب تايمز .... جميع الحقوق محفوظة
المقالات المنشورة ارسلت الى عرب تايمز من قبل الكاتب وهي تعبر عن رأي الكاتب ولا تعبر بالضرورة عن رأي عرب تايمز