مريم الحسن
seccar4@wanadoo.fr
Blog Contributor since:
16 October 2012

 More articles 


Arab Times Blogs
كذّاب إنتَ يا أمل بُكرا

و بعدنا بنقول بكرا

و بنكذّب على حالنا بالفكرة

بلكي مركب البكرا

على شي حلم بودينا

على حلم حلمناه مبارح

و بعدو بعتم الأمل سارح

ضايع و بكل المطارح

لحقناه و ما كان يلاقينا

و بعدنا بنقول بكرا

مع إنو الحلم صار ذكرى

غافي متل حكاية على سطرا

مغطى بغبرة الأيام

و مدفون بعمق أمانينا

مدفون متل سِر ما بيومنا حكيناه

مشَرّش بالعمر متل جذر و سقيناه

من بير أمل ما بيوم صَدقت نواياه

بنصدقو و نحن كذبتو عارفينا

كذّاب أنت يمكن يا أمل؟

بتبيعنا الكذب كل ما بتنسأل؟

عن بكرا اللي مخبي الفشل

و عن حلمنا اللي تاه منا و نِسِينا؟

كذّاب انت...ايه أكيد يا أمل

مش يأس لكن واقعك بيحمل جدل

قشة إنت و تعلّق فيها الغريق

صديق للي ما بقيلو و لا صديق

كذبة و قبلناها من الحياة بلا زعل

بتكذب علينا و بنصدقك تضلك أمل

يصحى عليه بُكرنا من غفيتو و يفيق

عيَوم احتمال كبير يكون لمبارح رفيق

و متل مبارح ناطر مركب البُكرا

يوَدِّيه على حلم ما صار بعد ذكرى

علقان بذات المكان و بذات الفكرة

ناطر الوهم يغطي بكذبتو الحسرة

كذبة انتَ يا أمل و الحق ما منو زعل

وهم و عم يكذب علينا انو بكرا في أمل

ملاحظة
صحيح انو لا يأس مع الحياة و انو الحياة لتكفي لازمها أمل.... بس هيك أمة مات فيها الأمل من زمان...مبارح اعتل من الفقر و الجوع...و اليوم انقطع راسو من الجهل و الخرف...و بكرا...و بما أنو المكتوب بينقرأ من عنوانو...أقصى آمال هاي الأمة إنها تتفرج على باقي الأمم و تصفق لهم من خيبتها لأن مش واعية لمصيبتها و فضيحتها







تصميم عرب تايمز .... جميع الحقوق محفوظة
المقالات المنشورة ارسلت الى عرب تايمز من قبل الكاتب وهي تعبر عن رأي الكاتب ولا تعبر بالضرورة عن رأي عرب تايمز