ابن النيل
Darwisha78@gmail.com
Blog Contributor since:
10 November 2014



Arab Times Blogs
المصريين في بلاد المحجر!

اتعلمنا في المدارس و احنا عيال (ده علي أساس ان ده كان تعليم أصلاً) ان الشعب المصري له خصائص فريدة من نوعها. شعب اصيل، طيب، كريم، خدوم، محب للغريب، متلاحم، شجاع....الخ الخ. و كان الاستاذ العلّامة الجهبذ الحاج عبد الحميد ،مدرس اللغة العربية في مدرستي الإعدادية، بيأكد ده دائماً خاصة لما كان بيطيح فينا و ينزل ضرب في اي تلميذ حظه الأسود انه وقع في ايده و هو بينخرب في مناخيره في الحصة بتاعته

 كنّا بنشوف عظمة و طيبة الشعب المصري بتتجلّي قدامنا بين آهات و صراخ زميلنا اللي بيتبهدل و حرفنة الحاج عبد الحميد في تسديد اللكمات و الركلات بشكل فني يفكرك بحرفنة محمد علي كلاي و رشاقة راقصى باليه بحيرة البجع

اتربينا علي شعارات خليتنا نتأكد ان احنا أحسن ناس في الدنيا! و ان أصلا مفيش حد في الدنيا غيرنا! و كلام من عينة "لو لم أكن مصرياً لوددت ان أكون مصرياً". طبعاً! العالم كله بيغير مننا و نفسه يبقي زينا

بعدما شددت الرحال الي بلاد الفرنجة بحثاً عن تعليم و فرصة اكتساب خبرات جديدة، كانت اول مهمة أني ألاقي أعضاء من الجالية المصرية علشان اعرف اظبط أموري في اول تجارب الغربة

  الاستاذ مُحب: حمدالله علي سلامتك نورت البلد، الأخ منين؟

انا : الله يخليك، انا من وسط البلد في القاهرة

الاستاذ مُحب: أحسن ناس، و ناوي تقعد معانا علي طول ولا زيارة

انا : لسة عندي جامعة و بعد كدة هنشوف، حضرتك ايه رأيك؟

الاستاذ مُحب: بصراحة البلد هنا زي الزفت و صعبة اوي، ناس كتير زيك ماستحملوش اكتر من شهور

انا : يا ساتر! ليه كدة؟

الاستاذ مُحب: بص انت شكلك ابن ناس وانا هقولك نصيحه لوجه الله، لو عايز تكمل في البلد دي، ابعد عن المصريين خاااالص

انا : ده علي أساس ان حضرتك من نيكاراجوا؟ طب ما انا و انت مصريين

الاستاذ مُحب: بص يا حبيبي انا قلتلك و عقلك في راسك تعرف خلاصك

طبعاً انا قلت ده راجل مجنون! عدت الأيام و قابلت واحد مصري تاني... الاستاذ موفَّق : يا أهلاً بيك يا حبيبي اتفضل اشرب حاجه

انا : أهلاً بيك

الاستاذ موفَّق : لو محتاج اي حاجه قل لي احنا اخوات في الغربة يعني

انا : الله يخليك انا كله تمام، انا عايز بس اي نصايح منك كدة تساعدني في التأقلم علي البلد

الاستاذ موفَّق : بص بيني و بينك كده، لو عايز تعيش و تنجح هنا...ابعد عن المصريين! خليك كده من بعيد لبعيد أحسن ممكن يجيبوك الارض

انا : برضه؟؟ ده الاستاذ مُحب نصحني نفس النصيحة

الاستاذ موفَّق : يا شيخ؟ أهو انت بقي لازم تبعد عن مُحب ده بالذات! هيوديك في ستين داهية

طبعاً انا كنت مذهول ان الكلام ده اتكرر مع تقريبا كل المصريين اللي قابلتهم و كانو بيحكولي قصص امنا الغولة عن ازاي كل واحد منهم اخد خوازيق من التاني. أومال فين بقي طيبة و حضارة المصريين؟ ما علينا... لما لقيت الناس كلها بيخزوقوا في بعض قلت يا واد خليك في حالك و ملكش دعوة بأي حد

 مذاكرة و شغل و سفر و ترحال لسنين طويلة بعد كده و كنت ابعد ما يكون عن الجالية المصرية. من نجاح الي نجاح في مجال عملي و عشت احلي ايام حياتي خمستاشر سنة عدت و الدم حن أني أدوّر علي مصريين تاني..وحشوني. فعلا بدأت اعمل علاقات مع ناس متغربين زي حالاتي كده و كانت بصراحة أوقات جميلة و رجعولي ذكريات اجمل

ابتسمت وانا اتذكر رحلتي مع الحياه و انا واقف في طابور استلام اعانة البطالة من الحكومة

و مانشوفكوش فحاجة وحشة







تصميم عرب تايمز .... جميع الحقوق محفوظة
المقالات المنشورة ارسلت الى عرب تايمز من قبل الكاتب وهي تعبر عن رأي الكاتب ولا تعبر بالضرورة عن رأي عرب تايمز