د. حسن أحمد عمر
hassanomar75@yahoo.com
Blog Contributor since:
19 February 2007

كاتب وشاعر مصرى

 More articles 


Arab Times Blogs
أحلام كاتب مصرى

عايش احلم بموقع

ع النت يكون مشهور

أكتب واعلق وافكر

وأغوص فى كل البحور

واتكلم بعلو صوتى

وتكون حياتى نور

ومخافش من أى واحد

يعمل علىّ حصار

يفرض علىّ كلامه

 ما هو دكتاتور جبار

واللى يخالف نظامه

يصبح من الكفار

يا مصر ياطيبة

يا نبع كل جمال

يا غالية يا حنينة

يا ام الرجال ابطال

حبيت انا تربتك

وعشقت وطنيتك

وشربت من ميتك

يا صابرة على كل حال

يا حلوة يا سمرة

ياام البيوت عامرة

يا ام العيون ساهرة

يا ما عذابك طال

نفسى أقول واحكى

عن كل شىء واشكى

ليه يكتموا الأفكار

ليه يكبتوا الآراء

يرضيكى يا حرة

إبنك يعيش مكبوت ؟

لا يقول ولا يتكلم

ولا ينسمع له صوت ؟

مع إنه متعلم

وكمان بيحبك موت

لكن بيتألم

من قسوة الجبروت

ده حتى بيتهته

صبح اللسان مربوط

فى كل متر يابلدى

يقابلنى بعبع يم

 اللى يقول له بم

ياكله فى بطنه عم

سيبونا يا عالم

على بعضنا نتلم

يمكن مع الصحبة

جرح العليل يتلم

ونرجّع الإنسان

قصدى اللى كان إنسان

يمكن يفكر يهم

ينهض يقاوح يكافح

ويعوض اللى راح

دا المصرى أصل الحضارة

سيبوه يداوى الجراح

ويبدل الكبت كلمة

بدل العداوة سماح

ويغير الفعل (يكره)

إلى (يحب) النجاح

ويغير الفعل (يحقد)

إلى صلاح وفلاح

ويغير الفعل (يقتل)

إلى ( يعيش) مرتاح

ويغير الفعل (يشتم)

إلى لسان صداح

ويغير الفعل (فرق)

إلى ( يلم) الجراح

ويغير الفعل (يقهر)

إلى احتضان وسماح

نفسى الاقى موقع

ع النت يكون مشهور

أكتب واعلق وافكر

واغوص فى كل البحور

لا حد يقول لى بخ

ولا حد يقول لى هس

ولا حد يقول لى نخ

ولا حد يقول لى بس

المصرى يا جدعان

عمره ما يبقى جبان

هو صحيح غلبان

ويحب صاحبه كمان

لكن فى الجد راجل

زى الجبل رسيان

ويعشق الحرية

زى الهوا والمية

ويحب كل الناس

قلبه ملان إحساس

ويحب يعيش فى أمان







تصميم عرب تايمز .... جميع الحقوق محفوظة
المقالات المنشورة ارسلت الى عرب تايمز من قبل الكاتب وهي تعبر عن رأي الكاتب ولا تعبر بالضرورة عن رأي عرب تايمز