ماهر دريدي
maherdj@hotmail.it
Blog Contributor since:
07 March 2010



Arab Times Blogs
مشروع الشرق الاوسط الكبير والربيع الغربي

مشروع الشرق الاوسط الكبير  طيب !!!! هاي التورتا كبيرة ... ما بصير تيجي حضرتك وتلهف نصها والأخ الثاني يلهف نصها !!! وين حصتنا في الوليمة ؟  شو شباب شكلكم بدكم تكوشوا على التورتا لحالكم واحنا وين ؟  اتذكروا انو إحنا اللي فجرنا الوضع عشان هيك حطوا حصتنا على جنب !!!  بالله شو وهالسلاح اللي بنصنع فيه إلنا سنة وين بدنا نبيعه؟  بسيطة !!! مين اللي ضايل من هالدول المعفنة وبدها تحرير ؟  هاي !!!!  احسبها منيح وبيع سلاحاتك وحط دولاراتك في جيبتك اي هو حدا سآلك يعني !!!! شو شباب اذا بدكم تضربوا هذيك الدولة بالنووي إحنا شو بطلعنا ؟  يا زلمة الك حصة من البترول منيح هيك ؟  لَا ما بكفي ، بدنا كمان الغاز !!!  طيب وشو بالنسبة لحصة الاسد ؟  شو اللي بتحكي فيه إحنا الاسد ملك الوليمة وفي العادة بنعطي بقية الحيوانات حصة مشان يشبعوا والبقية إلنا مفهوم؟   وليش يا حبيبي حصتك اكبر من حصتي ؟  والك انت جحش شي ؟ إحنا أقوى ناس فطبيعي تكون حصتنا اكبر !!!! 

 طيب عندي أسئلة بعد هالمقدمة :

  ١. ما يسمى الربيع الغربي الذي فلقونا فيه وهمي يحكوا عن الحرية !!! تونس هلأ  اتحررت؟ ليبيا اتحررت ؟ مصر اتحررت ؟ اليمن اتحررت ؟ سوريا اتحررت ؟ والحبل على الجرار . طيب الأنظمة سقطت والنتيجة ما في استقرار والسبب إقرأ فوق اللي كتبته عن التورتا والوليمة لانه يا سيدي في جماعة لسه ما أخذت الحصة وعلى بين ما توخذ الحصة راح تموت الآلاف مؤلفة من الناس !!! انشاء الله اللي بحكيه واضح ؟ 

 ٢. هذول اللي قلوبهم بترف ومتعطشة ومتشجعة للحرية ، والله قضيتنا الى ٦٥ سنة وما حدا دبت في النخوة ليحررها مع انو اسرائيل كلها قد ( ) العقربة . وهالسلاح والمال اللي بفتوه دول الخليج لو انفتت على فلسطين كان اتحررت بدال ما في هالمصاري عم بقتله الناس بحجة الحصول على الحرية وأي حرية ؟ تكون فيها كلب حراسة وخادم لإسرائيل وامريكا ؟ 

 ٣. طيب اذا كان الموضوع بتعلق في الديمقراطية وحقوق الانسان ، ليش امريكا اوروبا ما تطلب من دول الخليج يعملوا شوية ديمقراطية ، يعني الجحش اللي بركض في سباق الجحوش اله حقوق اكثر من الانسان اللي هو ارخص ما يملكون !!!!

انظر الى المرأة في السعودية لتفهم عن ماذا اتحدث أيها العربي الحر !!!!!  ٤. يللي ما أخذ من التورتا بقصد من الشعب روحوا خذوه من فرنسا وبريطانيا وأمريكا ، طيب كيف ؟  لانه يا صاحبي في ليبيا والعراق انشفط منها البترول مقابل اكم صاروخ زتوه مشان يحرروا الشعوب اللي اصلا بدها تخلص من النظام المعفن الموجود من عشرات السنين !!!  طيب مش إحنا وامريكا وأوروبا بنعتبر القاعدة تنظيم ارهابي ؟ على اي اساس القاعدة بتدخل على سوريا مشان تحرر الشعب السوري ولا عشان تخرب سوريا ؟ هينا شفنا عمليات القتل للناس الأبرياء الذين ليس لهم لا ناقة ولا جمل في موضوع التورتا .

مش الاولى اذا كان الموضوع بتعلق في الجهاد انها تدخل القاعدة على فلسطين وهناك بجاهدوا وشو بدكم احسن من هيك جهاد ولا لا يجوز شرعا محاربة اسرائيل لانهم من اهل الذمة !!!!! يا مفتي الناتو !!!!!  طيب .. طيب  اليوم سوريا وبكرا لبنان وبعدو بلاد الشام بتكون كلها موحدة دولة واحدة تحت امر تركيا او دول الخليج ولا تنسوا لازم يصير هيك مشان ايران ما تشكل خطر على اسرائيل ولا لليش اصلا كل هذا مشروع الشرق الاوسط الكبير ؟ عشان سواد عيونّا يعني ؟ صحتين يا اسرائيل !!!!  الربيع الغربي يا عربي مشروع اتخططله مشان يوخذوا المصاري مشان يطلعوا من الأزمة المالية واحنا راح نضل نشحد الى ابد الآبدين عشان هيك خليك اتفرج وشوف كيف بتنسرق مواردك قدام عينك وبتقول تحيا الحرية في سوريا وفي فلسطين .  أيها العربي الحر ترحم على ما بقي لنا من ذاكرة وطن اصبح كعكة تورتا الجميع يأخذ نصيبه الا انت !!

  أيها العربي الحر لا تصدق ما يقوله لك المحللون السياسيون ولا تصدق نشرات الاخبار فلكل يتآمر على قلبك  وعلى بلدك لتكون خادما لأمريكا وإسرائيل وأوروبا الجائعة التي تتغذى على بقايا التورتا يا صديقي  ومش بعيد يا صديقي هالشرق الاوسط الكبير تقوده دولة قطر اللي ما بتيجي قد ( ) العقربة عشان هيك نازلة بتفت مليارات ولا انت شو رأيك كمان ؟  أيها العربي الحر لا تمت حتى تكون شاهدا على الخريف العربي والشتاء العربي والصيف والربيع فجميعها تنتظرك ، فستعد وتهيأ لتخرج من بيتك من غير ملابس كي لا يتعرفوا على ديانتك كي لا تقدم قربانا من اجل الحرية !!! 

 أيها العربي الحر لا تنتظر مستقبلك بعيونك السوداء كي لا تقلع  لتكون شاهد عيان على الثورة  القادمة فهنيئا لك في ثورات الربيع العربي وفل تحيا الحرية ونحن بإنتظار السلام .  







تصميم عرب تايمز .... جميع الحقوق محفوظة
المقالات المنشورة ارسلت الى عرب تايمز من قبل الكاتب وهي تعبر عن رأي الكاتب ولا تعبر بالضرورة عن رأي عرب تايمز