عباس داخل حسن
altnoor62@gmail.com
Blog Contributor since:
07 January 2011

 More articles 


Arab Times Blogs
لاطشين .. ضايع وطنه بيكم

 الى : كافة كاتبات وكتاب المنطقة الحمراء . اليوم سالفتنه طويله وراح نسويها كًعدة عشاير وصلح لان طكًٌت ارواحنا من مؤتمرات الكتل السياسية ، وصارت مليوصة وعالكه ولحد الان مانعرف هاي إلمن وهاي إلمن ، وصار المشهد السياسي هاي .. وهو.. وهية ، وطک إصبعتين ، ونريد نخلص من معمعه يطلعون بالف معمعه ومعمعه اي تدوير المعمعات صارت سمة المشهد كما قال احد رؤساء الكتل من وزن الريشة في المشهد المصخم وملطم ، يمعودين سووها صدك وصفروا عداد المعمعات واكلبوا صفحة ولو مرة وحدة : وعفى الله عما سلف .

والعفو عند المقدرة و طبعا طارق الهاشمي غير مشمول بهذا العفو لان قضيته عند القضاء وليس عند جوحي ابو الحَب وهنا ما أقصد القاضي جوحي لا والله . أقصد جوحي أبو الحَب مقابل سينما (النصر) وكلمة (نصر) المفروض ان تحذف من اللغة و قاموس العرب والعراقيين لان ليس لها وجود منذ 700سنة ونيف ، ومثل ما تعرفون اللغات أخذت بالتطور كما هو الانسان ، ولغتنا المقدسة والجميلة والكاملة في ضياع ، مثل اغانينا لورا ... لورا مثل بول البعير وصارت ( بتل البتل ) النشيد الوطني لجيل باكملة و(البرتقالة) على الموبايل تصدح في كل مكان متقدمة على (يمه كرصتني العكربة) حسب اخر استفتاء . وحتى ( باسم الكربلائي) صار نغمة على الموبايل ولوتدري نوكيا هيج چان خلته ضمن خياراتها وربحت زبائن كُومه ولكن سامسونج أشطر وأدهى منها وحطت خطب يوسي القرضاوي لهذا تراجعت نوكيا لان ماحسبت حسابها للعرب والمسلمین الغير قادرين والعاجزين عن صناعة حتى الغترة (الشماغ) التي يلبسوها . الصناعة الوحيدة المتمكنين منها هي صناعة الارهاب ولديهم فائض من الارهابيين للتصدير ، وأنَعم الله على الصين متكلفة بدشاديشنه وملابسنا الخارجية والداخلية ولو من النايلون وخام الكودري ولباس نص او طويل مو أبو الخيط لاننا شعب محافظ جدا ولهذا قامت بعض الدول العربية بمصادرة اي لباس داخلي (كلسون) مثل مايسموه اخواننا اللبنانيين غير مطابق للشروط الشرعية . ولولا الصين لبقينا عرايه وكَل واحد حاطله خوصات من سعف النخل يستر الحال بيها . ونرجع لكعدتنه إلي يسموها السياسين بالعراق المؤتمر الوطني وهاي بدعة وكل بدعة ضلاله وكل ضلاله في النار ليش لاسامح الله المؤتمرات السابقة يعني مو وطنية مثل (مؤتمر أربيل) وشني يعني الجماعة يراد لهم مؤتمر وطني يثبت وطنيتهم وحرصهم على الوطن .

الرواتب ماشية والوزراء في وزاراتهم يواصلون الليل بالنهار من اجل النهوض بالشعب الطامس الحد اذنيه ومجلس النواب يقبضون رواتبهم الحاضر والغايب وان شاء الله ما حاضر ولا يوم واحد مثل أبو حمزة ( أياد علاوي) لان الحضور غير مهم المهم النوايا الوطنية الصادقة والتاريخ النضالي . لكن أكو شوية سوء فهم ببعض الامور والكعدة تصفي النفوس وتشيل الزعل ولو المعاتب صعب ، لكن بين الاخوان رؤساء الكتل كل شي يصير وتهون وكل واحد ياخذ حصته حسب الدستور ، وما يحتاج حتى اقتراح قناة الفيحاء بالنقل المباشر للمؤتمر ليش ماكو ثقه ، وسهلة جداً ، هي مناطق متنازع عليها ، وكم صهريج تهريب نفط ، وتعينات خاصة وقانون الاحزاب التي بدت تتكاثر أسرع من الفئران ، والامور مو ظلمة مثل مايصورها الاعلام المغرض والسلبي مثل مايكول رئيس التحالف الوطني إبراهيم الجعفري.

 وإخونه الاستاذ (ساهر عريبي) ما أدري ليش هو سهران الليل كله ومتعب نفسه وصاعد الضغط عنده واني اسمعت السهر يسبب السكري وصارت وياي ، وحاط كوره وكور رئيس الوزراء نوري المالكي چا بويه مو بس المالكي دكتاتور هي كلها دكتاتورية من أصغر موظف الى اكبر موظف بالسلم الوظيفي الأطول من سور الصين هاي تبعات المحاصصة وهای الرادها بريمر ... وهاي التمناها ... وعلكوها اولاد الحرام المحافظين الجدد الله لايردهم ويلعن ذكرهم ولايوفقهم دنيا وآخرة وزودتها دول الجوار الطائفية وچانت عايزه تمت وهسه يزعل الاخ (ساهر عريبي) عليه ويسويها كعده ثانية وثالثة مثل اللجان الي تحضر للمؤتمر اللا وطني صار أكثر من ستة شهور وقبض ماكو وأخاف يسويها مثل عركته مع الشاعر والاعلامي إخونه (وجيه عباس) وآنه أشوفه كل يوم ، كلما اكتب اسمي عله google يطلعي بچكارته مثعوله لعنان السماء ، والله يحرمهم إلي حرمونا من سوالفه الحلوه إلي طيب الجرح في برنامجه (عولمة بالدهن الحر) لان زيت الحكومة يسرطن وفاسد بس صرفوا للجيش والحمدلله ، وأقسم ان عركتكم على مشعان الجبوري مالها كل معنى لانه مو بس مشعان لطش ملايين غيره هواي من الفاو الى حد زاخوا وقابل بس مشعان المسكين إرهابي موجودين مثله بالمئات بالحكومة وخارجها لكن الطاكية مزروفه تحجي ویطلعك واحد سچينة خاصره وصرخ بوجهك عندك دليل .... شنو دليلك ؟ خائن ...عميل هم صحيح ترى يابه إحنه مو محكمة ولا هيئة نزاهة . لكن لاحولة ولاقوة إلا بالله اكثرهم للحق كارهون حتى لو لبسوا خمس خواتم على اليسار او على اليمين وكلمن مخبي إله كومة ملفات على الثاني ولي يلطش ويفلت ينسي ويصير مؤلف بالديمقراطية لو صاحب مؤسسة خيرية لو محاضر بالشأن العراقي بدول العالم المتقدم ، أين حازم الشعلان وأيهم السامرائي وكريم وحيد والجبوري والعبيدي وأسعد الهاشمي ؟؟؟؟ والقائمة طويلة ... وجيب ليل وخذ عتابه .

وفتحتوا عليه باب ما ينسد من المشاكل وقلبتوا المواجع وراح كلها ترفع عليه دعاوى تشهير امام المحاكم المختصة ، وماتفض بكعدة ولا بعشرة ونصير ملطشه ويطلعون بالأخير هم الأبرياء وخدموا الوطن في اصعب الظروف وحصلوا على سعفات ذهبية تلهث مو مثل دروع تكريم الاعلاميين من كارتون لو من تنك ماكو اسبوع وچلحت لو زنجرت ، والحكومة من تكرم واحد مو غشيمه كل واحد شهادة بطوله وقسم منهم يحمل دكتورا بحب الحسين وحب الوطن وحب الهور وحب الجبل وعمركم شفتوا دولة تملك مثل هذه الاختصصات ، وبعدكم ما راضين على حكومة التكنوضرا.. ومنجزاتها العظيمة ؟ الزبدة من الكلام ، أي الخُلاصة هذوله لاطشين على قلوبنا وعلى الوطن ومضيعن أمة واجيال باكملها والواحد من عدنه صار مثل (جبر...) ما يعرف السالفه. حتى يقضي الله امراً كان مفعولا . ودرءا للمعمعات اعتذر للجميع بعيدا عن أحجية الساسة العراقيين وطلاسم الدستور وخزعبلات اللجان والقائمين عليها من النائبات والنواب الذين انتخبهم الشعب بمحض إرادته وظل يلطم للمرة الثانية على التوالي .. ولا يلدغ المؤمن من جحر مرتين . وراح نشوف التكرصه الحيه بيده يخاف من جرة الحبل ، وما ينتخبهم مرة ثالثة لو ما يتعلم من التكرار وينجر بالحبل نفسه







تصميم عرب تايمز .... جميع الحقوق محفوظة
المقالات المنشورة ارسلت الى عرب تايمز من قبل الكاتب وهي تعبر عن رأي الكاتب ولا تعبر بالضرورة عن رأي عرب تايمز