د.فؤاد شيّا
Dr.fouadchaya@hotmail.com
Blog Contributor since:
07 August 2010



Arab Times Blogs
عبيد العصر الحديث

بتوعى الصبح بكيّر وبتجرب تتنشط أو بتقنع حالك انك نشيط وبتكرج عالشغل وبتبلش فلاحة يا 10 ساعات يا اكتر شوي واذا بتجرب تلوطع .. الله يعينك واذا ما كنت اصحاب انتا وكل الزملاء وراضين عليك على طول اكيد في واحد منن او اكتر رح يطقلّك برغي . منشان هيك خليك منتبه لكل كلمة بتحكيها وحط راسك بشغلك وبس .

بتخلص شغلك وبترجع عالبيت وانتا عم تكفر من عجقة السير والتحفير والتنقير وبيطلع السكري والضغط وما بعرف شو ممكن يطلع معك كمان .

بتوصل دغري تتحمم وبتقعد حتى تاكل ، ومرتك عم بتعلّم لولاد (هيدا اذا كانوا بعدون واعين ، حسب العجقة لي علقت فيها وكم ساعة بقيت حتّى توصل عالبيت ) بتبلش تنعس وانتا عم تسمع مرتك شوعم تقلك وولادك شو طالع على بالن ووين حابّين يروحوا نهارالأحد وحضرتك كامش الريموت كونترول بإيدك وعم تشوف وتسمع المصايب بلبنان وعند الجيران .

وما بتحسّ غير مرتك عم بتوعّيك حتى تفوت لا ( جوّا ) وبتقوم نص واعي ونص نايم ومش عارف حالك وين صرت ولما بتوصل لا ( جوّا ) هون المصيبة ... ما رح افضحك واحكي شو صار ودايماً بيصير جوّا ( بلا فضايح ) ... خلينا بالمهم ، بتوعى تاني يوم الصبح بنفس الطريقة لي وعيت فيها مبارح بس الفرق انو التاريخ تغيّر وبتبلّش نهارك بنفس الموّال ، وكل يوم نفس الشي .

بيوصل اخر الشهر بتقبض معاشك ( لي يمكن يكون الحد الأدنى ) وبتبلش التوزيع ( فواتير الكهربا وموّلد الأشتراك ( لا إنو دولتك من القرن الماضي بعدا ما امّنتلك كهربا متل الخلق ) واشتراك الدش واشتراك البناية والتلفونات والأنترنت وقسط السيارة وقسط البيت أو اجار البيت الخ الخ الخ ) طار المعاش وطاروا اعصابك وعقلاتك معو ، والمشكلي انو المصاري ما كفّوا حتى تدفع قسط المدرسة ، وركوض يا معتّر حتى تشوف مين رح يديّنك مصاري ، نشالله ما تكون فكرت انك رح تاخود الزودة ؟؟؟؟ يا حبيبي انتا دفعت قد الزودة على خمس مرّات اذا مش اكتر ، وين مفكّر حالك عايش ؟؟ ما قالتلك مرتك انو كيلو الخيار صار ب ( 4000ليرة ) وقسط المدرسة زاد (600000ليرة ) ونشالله مفكر انّو الدولة محافظة على سعر ربطة الخبز ؟؟ اذا ما بتعرف رح خبرك يا مسكين : كانت ربطة الخبز فيها 12 رغيف اليوم فيها 6 بس ( ولك ايه ) مش بس البنزين والغاز والمازوت ، كل شي صار عندو جوانح .

يا صديقي انتا مش اكتر من ( كونتا كنتي ) بس لونك ابيض وعايش بلبنان وبدل ما تكون عبد لا سيّد واحد صار عندك (128) سيّد هيدا غير مجلس الوزرا ويلي عم بيعطيهون اوامر .

قعود روّق أعصابك شوي وشوف حالك اذا كنت عايش أو مش عايش ، وبعد ما تتأكد انك عالهامش وعبد بالعصر الحديث رجاع دوّر هالتلفزيون وتابع اخبار اسيادك ولحقون من محطة لمحطة وزقّفلون و تخانق مع مرتك وجيرانك كرمالون .

بس يطريقك انتا ورايح على الصندوق ( يا صندوق ) تأكدلي اذا كنت عايش أو مش عايش .

_ اعتذر من جميع الأصدقاء في العالم العربي وفي المهجر على الكتابة باللّهجة العاميّة اللّبنانية ، فأنا افتخر بعروبتي ولغتي العربية ، لكنّي اضفت اللّهجة المحكيّة لكتاباتي الساخرة لتسهيل وصولها الى جميع الأخوة والأخوات اللّبنانيين والعرب وخاصّة الذين ولدوا في المهجر ولم يتلقوا تعليم اصول اللّغة العربية لذلك احاول دائما الوصول الى الجميع بدون استثناء







تصميم عرب تايمز .... جميع الحقوق محفوظة
المقالات المنشورة ارسلت الى عرب تايمز من قبل الكاتب وهي تعبر عن رأي الكاتب ولا تعبر بالضرورة عن رأي عرب تايمز