يوسف المصري
ebn_elnil29@yahoo.com
Blog Contributor since:
28 February 2010



Arab Times Blogs
استراحة الحاج مصطفى

سلام عليكو ياحج مصطفى
 وعليكم السلام يا شيخ محمد... اتفضل ..... تعالى عايزك ...
خيرا إن شاء الله ... أنا مستعجل فى ناس مستنيانى ؟
ياعم تعالى ... ريح شوية ... حتى أحوالك اليومين دول مش عجبانى !
ليه بس ياحج ؟؟
عايز اعرف مالك ... مهموم ليه ؟؟
والله ياحج مصطفى أحوال الناس مشعجبانى اليومين دول !!
 ليه بس ؟؟
أديك شايف ... الناس كلها بتحارب الإسلام والمسلمين !!!!
ايوه يا شيخ محمد ........ أنا سمعت اللى عملوه ولاد الفرطوس بتوع الجبنة اللى رسموا صور "مسيئة" للرسول" !!!
ياريت رسيت على كده ياحج مصطفى !!
ليه ... هو فى ايه تانى ؟؟؟؟
فى سويسرا منعوا بنا المآذن على المساجد الجديدة !!
ومين سوسرا دى كمان ؟
دى بلد أوربى صغير ...... ماحنا بقينا ملطشة للى يسوى واللى ميسواش !!!!
ولاد الفرطوس ..... امال المسلمين فى البلاد دى يسمعوا الأذان ازاى ؟؟؟
أنا عارف بقى ياحج.... ربنا يتولاهم ... هنعمل ايه ؟؟؟
طب والمسلمين عملوا ايه ؟؟؟
معملوش حاجة ياحج ... شوية مظاهرات واعتراضات ... !!!!
بـس ؟؟؟
بس ياحج......... والناس فرحانة فينا !!!
يلا داهية تكحتهم الكفرة مطرح ما يروحوا .
آمين ياحج .
هو فى زينا احنا المسلمين ...... طول عمرنا مسالمين وفى حالنا !!!
أيوه ياحج ، طول عمرنا طيبين وعايشيين بالفطرة .......... بعد إذنك يا حج مصطفى!!!
رايح فين ياشيخ محمد بعد ما قلبت دماغى ؟؟؟
والله ياحج رايحين نشوف حكاية جرجس البقال ، اللى عامل بيته كنيسة وبيصلي فيه هو وشوية نصارى ..!!!
واااه !! أبن الفرطوس !! آل بيصلى آل !!!! ..
الشيخ محمد : ايو ياحج ..... ما دي اللى كان ناقص .!!!!  مش كفاية راضيين يعيشوا وسطينا ...!!!
لا دانا لازم أروح معاكم ......  وصلاة الضهر ممدودة للعصر ..

تعالي ياحج مصطفى .... 

آل يصلي آل !!







تصميم عرب تايمز .... جميع الحقوق محفوظة
المقالات المنشورة ارسلت الى عرب تايمز من قبل الكاتب وهي تعبر عن رأي الكاتب ولا تعبر بالضرورة عن رأي عرب تايمز