مصطفى محمود
musisusi@24e.at
Blog Contributor since:
31 March 2011



Arab Times Blogs
ثورات فى كل مكان

 هو فيه أيه يا جماعة الثورات بقت فى كل مكان حتى فى البيوت أصبحت تعج بالثورات ، أنا صحيت النهاردة الصبح لقيت الواد شرشور لامم حواليه بعض الجرذان أصحابه والبهوات عاملين إعتصام تحت الطرابيزة بعد أن أطلقوا عليها أسم طرابيزة التحرير ويرفعون بعض الشعارات الثورية و التى علمت من مصادر موثوق فيها إنها تطالب بإسقاط النظام و إقامة نظام ديموقراطى عادل و شفاف و إقصاء رموز الفساد عن مواقعهم المتبتين فيها منذ عهود مضت ومحاكمتهم ، وكلام كثير وشعارات نارية زى شعارات الثورات التى هزت اليومين دول عروش و كراسى حكام الدول المجاورة ، شفتوا الولد الشرشور عايز يعمل إيه ، أنا عارف إن الجرذان دول واخدين حبوب الهلوسة أنا بقى مش حأقعد أطارد الشرشور زنقة زنقة ولا حتى دار دار زى واحد كده من إياهم عنده الدنيا بتتهد ده حتى الراجل من جينانه أعلن الحرب على شعبه المسكين ، هو فيه حد عاقل فى الدنيا يعمل كده 

 شعبك خلاص بعد 42 سنة غلب عايز يطلق منك ، هو الجواز بالعافية ولا أيه ، إذا كان على الحكم و طبق السلطة ده الى إنت متمسك بيه للدرجة دى خلاص محلولة ، نشوف لك كده حتة أرض زى الفل فى الصحراء ليك ولحبيابك الى عايزينك تحكمهم و نوعدك كمان إن يكون لونها أخضر فاتح أو غامق مش حاتفرق اهو زى لون كتابك بالظبط ، وأقعد أحكم بقى زى ما أنت عايز وسيب شعبك الغلبان فى حاله ، دى مجرد فكرة أنا بعرضها يمكن تحل المشكلة دى ونخلص بقى من القرف ده علشان نشوف حد غيرك بقى ، ولا أقولك يا عم أنا مالى ده راجل ضارب ، خلينى أنا فى المشكلة بتاعتى 

 عموما أنا قررت التعامل مع الموقف ده بحكمة وطبعا الواحد لازم يتعلم من الثورات والتعامل معها من الشعوب المجاورة ، أنا على طول رحت طرحت على الشرشور هو وأصحابه الجرذان حزمة إصلاحات زى الى طرحها الراجل ده بتاع اليمن بس عنده هو ماجابيتش نتيجة بل أتت بنتائج عاكسية ولكن يا إخوانا السياسى المحنك لازم يجرب كل الكروت الى فى إيده و ميسلمش طبق السلطة كده بسهولة، إنتم عارفين طبعا فوائد السلطة دى أد أيه ، دى أهم حاجة فى الأكلة كلها ، المهم طبعا سوف تسألونى وهى أيه دى حزمة الإصلاحات وأنا طبعاٌ حاقولكم دى حاجة كده عامله زى حزمة الجرجير بالظبط ، يعنى زى ما حزمة الجرجير بتعمل عملية تطرية على القلب برضوا حزمة الإصلاحات بتعمل عملية تطرية على الحالة السياسية القائمة ، او أقربها ليكم بمثال ثانى، يعنى لو قاعدة كده كلها شباب بس وفاجئة دخل عليهم شوية بنات زى العسل ، شوفوا إنتم بقى القاعدة ها يبقى شكلها أيه ، المهم إن أنا بعد لما قدمت حزمة الإصلاحات دى رحت على طول تابعها بشوية أكل من اللى قلبك يحبه ، بصيت لقيت الشرشور هو و الجرذان اللى معاه نسيوا هما معتصمين ليه 

 أه ما هو المثل بيقول عند ملى البطون تستحى العيون و بكده عرفت أدارى المسألة قبل لما الجزيرة تيجى و تجرسنى على مستوى العالم وأبص الاقى نفسى تحت ضغط دولى و يروح اوباما بعثلى المندوبة بتاعته ويروح طالع فى التلفزيون بتاعه ويطالبنى بترك الكرسى والجلوس على الأرض زى بقيت الناس و أنا أقعد أقنعه بأن كل شئ تمام والحالة عال العال ومفيش أحسن من كده وبإن الكرسى سليم وأنا لسه عامله شوية تصليحات عند النجار الى على ناصية الشارع وأضطر أطلع فى التلفزيون علشان أقول بقين أو ثلاثة حمضانين و ملهامش أى لازمة يروح الناس ما يصدقوا ويروحوا عملينهم رنة للتليفون و فى الأخر برضوا حأضطر أجر عربيتين أو ثلاثة نقل بمقطورة طبعا علشان أنقل بيهم السلطة ، و ده طبعا بعد لما أكون قتلتيلى كده حاجة بتاعة 500 أو 600 شاب من الشباب الى زى الفل وكمان جنبيهم كده حاجة بتاعة 2000 لأ قول 3000 عاهات مستاديمة و إيه يعنى هما بتعونا ، و بعدين أقولهم شوفولى بقى يا جماعة خروجة مشرفة تليق بواحد جوع شعبه وسكنه المقابر و ملأ بلاده بالعشوائيات وجعل شبابه يهرب من جنته المزعومة حتى و لو كان الموت غرقا هو المصير المحتوم ولو كنتم عايزين دليل على حكمتى وعدلى فقدامكم ولادى الأثنين أهم فأنا قسمت عليهم البلد بالتساوى وحتى أمهم سيبتلها حاجات ثانية علشان تتلهى فيها و كل الى إحنا قدرنا ننهبه من دم الشعب الغلبان هما يا دوب شوية كام مليار عمى ده حتى يا جماعة الكفن مالوش جيوب مش كده ولا أيه ، شوفتوا بقى أنا إزاى قدرت أتخلص من ثورة الشرشور، قال عايز يقلد شباب التحرير قال ، بس الشرشور نسى إن أنا مش حسنى وكمان وزير داخليتى مش العادلى ولا وزير إعلامى هو أنس ،على فكرة يا جماعة الشرشور ده هو الكلب بتاعى شارلى 

 تحياتى







تصميم عرب تايمز .... جميع الحقوق محفوظة
المقالات المنشورة ارسلت الى عرب تايمز من قبل الكاتب وهي تعبر عن رأي الكاتب ولا تعبر بالضرورة عن رأي عرب تايمز