أسعد أسعد
assaad_for_jesus@yahoo.com
Blog Contributor since:
17 April 2007

أسعد شفيق أسعد
كاتب من مصر مقيم في امريكا
الميلاد : 18 أغسطس 1942 المنصورة - دقهلية - مصر
المهنة : مهندس بولاية ماساتشوستس - امريكا
المؤهلات : بكالوريوس الهندسة الصحية و البلديات
كلية الهندسة جامعة الاسكندرية - 1969
دبلوم الصحة العامه - الهندسة الصحية
المعهد العالي للصحة العامة - جامعة الاسكندرية - 1974
الحالة الاجتماعية : متزوج من المهندسة عايده حبيب عبد الشهيد خريجة نفس الجامعة و نفس التخصص و تعمل معي في نفس المجال . لنا ابن واحد فيليب - مهندس و ابنه واحدة فيبي - صيدلانية
المجال الثقافي : الدراسات و الابحاث الدينية "المسيحية - الاسلامية - اليهودية" مع الدراسات التاريخية المتعلقة بها
النشر :بدات الكتابة منذ اقل من سنة وقد نشر لي حتي الان مقالات دينية و سياسية و البعض لم اقم بنشره بعد

 More articles 


Arab Times Blogs
دموع بهيه

و بهيه ماشيه في طابور طويل شايله نور عنيها و قلبها

فرحة شبابها و عمرها و راجلها ضناها أصله إبنها

في جنازه طويله خطوتها بطيئه و هي علي مهلها

ماهي طول عمرها حزينه و دموعها بتجري علي خدها

و ضناها حبيبها جسمه بارد علي كتفها

بتنوح عليه النوّاحه و بهيه تايهه في حزنها

رصاصه جت في قلبه خدها عنها بدل ماتيجي في قلبها

و دمه يجري من جروحه علي تيابها علي طرحتها علي أرضها

و آه يا بهيه ياولدي علي حزنها

مكسوره إنتي يا أمي و الاّ مغلوبه علي أمرها

 

و الحكايه إنه كان غيران عليها و علي شرفها و مجدها

راح في المظاهره يهتف بأعلي صوته و يسمع الدنيا كلها

طلعوا عليه الديابه اللي كانت بتنهش عرضها

ضربوا عليه المدافع عشان تموت هي و إبنها

أخد الرصاصه في صدره و هو بيهتف بإسمها

و كتمت الصرخه بهيه و الحزن قطّع قلبها

و طّت علي الأرض و شالت جسمه و دمه مخلوط بدمعها

و وقفت بهيه شامخه و الولد علي كتفها

بصت حواليها لقت كل الوشوش إبنها

طارق و باسم و ماجد و محمد و جرجس و صالح كلهم جنبها

إبنك ما ماتش يا بهيه دي نفس طاهره راحت عند ربها

المجرم قتل واحد و الباقي واقف سور حوالين عزتها و مجدها

 

خلي الجنازه تسير مش ممكن بهيه تنسي ذكري إبنها

و كل خطوه حواليها تدب يطلع م الأرض ألف إبن في حضنها

مين إللي يقدر يموّت بهيه طول ما فيه مصري عايش بيقول أنا إبنها

مين إللي يقدر يذل بهيه طول ما فيه مصري بيدافع عن شرفها و عرضها

 

كل ترابك يا بهيه أهرامات تحكي مجدك بهيبة مجدها

كل نيلك يا بهيه ميه جاريه شايله في حبّاتها دموع كل أم في حزنها

كل نسمه بتفوت عليكي يابهيه بتواسي كل أم مكسور قلبها

كل البشر بتبص لك و بيحسدوكي مافيش زي ولادك في الدنيا كلها

لما يصحوا صرخه واحده تطلّع الشمس من ورا الغيمه أو حتي بعد غربها

لما يقولوا كلمه واحده لازم الدنيا تسمع و القدر ينصر بهيه و يشدد عزمها

 

إمسحي دموعك يابهيه إبنك و هوه شهيد دك العروش و هدها

إبنك بصرخة حياته زلزل حكومة الظلم و حطم دولته و غيّر حكمها

إبنك بحياته علّم الدنيا إزاي تصحي و إزاي تثور و إزاي تاخد حقها

إبنك يا بهيه أصبح علم علي ربوه عالية شعوب كتيره تشتاق توصل لها

كفي دموعك يا بهيه لسه طريقك طويل و سكة المجد عارفه نصر مصر و شعبها

شدي حيلك يا بهيه كل واحد فينا يصرخ إنتي أمي إنتي مصري إنت بلدي إللي أنا باحبها   







تصميم عرب تايمز .... جميع الحقوق محفوظة
المقالات المنشورة ارسلت الى عرب تايمز من قبل الكاتب وهي تعبر عن رأي الكاتب ولا تعبر بالضرورة عن رأي عرب تايمز