د.فؤاد شيّا
Dr.fouadchaya@hotmail.com
Blog Contributor since:
07 August 2010



Arab Times Blogs
عيشة الكلاب

 

مين بيعرف شو يعني عيشة الكلاب ؟  بس تسمعو هالكلمة فوراً بيجي على راسكون صورة كلب معذب ووسخ وعم بيدوّر على الاكل بالزبالة ومبلل تحت الشتي وما عندو مكان ينام فيه  و البلدية لاحقتو من مكان لا مكان حتى تقتلو .

اذا هيك عم تفكرو .. يعني صار لازم تغيرو تفكيركون لا انو دولتنا قررت تهتم بالحيوانات وتعطيها كل حقوقها الحيوانية و خاصّة النفسيّة منها منشان هيك قررت الدولة استبدال الأولويات لا انو الانسان اللبناني ما بيشبع شو ما قدّمتلو حكومتو والأضرب من هيك ولا مرّة بيشكر الدولة على شي .

فا اجا دور الحيوانات بلكي هي بتشكر الحكومة على الجهد والتقديمات وقوانين الحماية الحيوانية

وصار هالشي بالفعل الحكومة فوراً قررت ونفّذت وفرضت صلطتها وهيبتها وهيمنتها عالوضع وصارت الكلاب و البسينات باحلى حالاتها .

فعلاً يا اخوان الحكم ملح الارض، ازا بتشوفو كيف الكلب عايش عند صاحبو بتقولو نيالو شو مغنّج و مدلل ، كل شهر بيروح عند الدكتور  وكل يوم في مين يحممو ويهتم فيه و يمشطلو شعرو وياخدو مشوار كل يوم مرتين ويشتريلو اكل خصوصي ويشوف حالو فيه قدّام العالم وبياخدو معو على شغلو احياناً .

مش مشكلي اذا ما قدرت تاخود ولادك على الدكتور المهم انو الكلب يروح لا انو صحّتو بتهم المجتمع كتير ، ولا مشكلي اذا ما قدرت تشتري حفاضات وحليب لا ولادك  المهم الكلب يكون عندو اكل صحي و مغذّي و مطابق للمواصفات الصحّية العالمية ، و ما بيهم اذا ما قدرت تاخود ولادك عالمدرسة  المهم انو الكلب يكون قادر يروح على مدرسة مرتّبي حتى يقدر يمد ايدو ويسلّم او يوقف على اجرتين بس ( شي كتير حلو انك تشوف كلب واقف على اجرتين و عم بيسلّم عليك ..شي بشرح القلب ) مش حرام انك تترك ولادك بالبيت لا انك مش قادر تاخدون مشوار بس اكيد حرام ينترك الكلب بالبيت بلا كسدورة .

و الاهم من هيك مش مشكلي اذا القوى الامنية قوصّو على ابنك بنصّ الطريق وقتلوه ولا مشكلي اذا شخص ضحّى بي عمرو وهو عم يهتم بي حقوق الانسان ينزتّ بي نظارة الامن العام بي مكان ما يليق بالغنم والبقر من غير ما حدا يحترمو ولا مشكلي اذا دركي وقّفك بالطريق وكان مزاجو معكّر وطلع على بالو يفشّ خلقو فيك ويبهدلك قدّام العالم ومش كتير مهم اذا زوجة قاضي ضربتلك سيارتك لا انها ما بتعرف تسوق و طلع الحق عليك وجوزا بعت دورية حتى يشدّوك عالحبس وتتعلم درس ما تنساه بحياتك ولا كتير تعزّ عندك الدني اذا كنت مفكر حالك استاذ مدرسة محترم وساقبت انو ابن واحد من المسؤلين تلميذ عندك وطلب منك اسئلة الامتحانات وانت رفضت وبعتلك المرافقين تبعو ومسّحو فيك الارض قدّام العالم ولا كتير تزعل اذا ابنك فات على حبس روميه بتهمة خناقة مع اصحابو وطلع من روميه تاجر مخدرات درجة اولى .. بالعكس لازم تنبسط انّو ابنك تعلّم مصلحة تنفعو بالحياة وما كتير تاخود الامور شخصية اذا بنتك راجعة من السهرة بالليل وحدا اغتصبها ولما راحت على المخفر لا تشتكي شحتوها وقالولا كان لازم اهلك يربوكي يا شر... اكيد مش لازم تزعل لا انو بنتك ما الا حق تسهر متل ولاد الناس لي معون مصاري وقادرين يحطولا شوفير ومرافق و اكتر شي لازم تكون رايق اذا ابنك تخرّج من الجامعة وما قدر يلاقي شغل لا انو ما عندك واسطة .. ولك خليه يسافر يشتغل ايّا شي برا ..اصلاً هيك لازم اذا ما عندك واسطة لشو عيشتك انت وابنك وبنتك روح يا عمّي قدّم طلب لشي محكمة حتى تغيّر جنسك وتطلب انك تصير كلب بلكي بتحن عليك هالمحكمة و تحوّلك لا كلب .. ساعتها ممكن ؟؟ عم قول ممكن تصير مواطن (قصدي كلب صالح للعيشة بي هالبلد) و تصير الدولة تحترمك ... شفت شو حلوي عيشة الكلاب

 







تصميم عرب تايمز .... جميع الحقوق محفوظة
المقالات المنشورة ارسلت الى عرب تايمز من قبل الكاتب وهي تعبر عن رأي الكاتب ولا تعبر بالضرورة عن رأي عرب تايمز