ماهر دريدي
maherdj@hotmail.it
Blog Contributor since:
07 March 2010



Arab Times Blogs
تحليلات سياسية مستوى أول

 
شايف شو اللي صار؟

ما انا عارف من كذا شهر انو راح يصير هيك

يعني كاين تضرب في المندل … شو عرفك؟

كيف شو عرفني ؟ ما جماعتنا الهم كذا شهر وهمي بقولوا بنتفاوض بالسر ويشويش وبعدين رغم هيك قالوا التفاوض بالسر ما بجيب نتيجة واتقاتلوا انو يعملوها سرية ولا علنية وباخر المطاف عملوها علنية

طيب وبعدين شو صار؟

كيف يا زلمي شو صار . هههههه عملوها علنية وروح هان وهناك واجتماعات وتحضيرات وقال شو تشكيل لجان عشان يتفاهموا على القضايا المصيرية شايف كيف وبعدين في يوم وليلة قالوا جماعتنا وقفوا ابنقدرش نكمل ؟

وليش يا اخوي ما بدهم يكملوا مهمي صرعوا العالم وهمي يقولوا ما بتتحرر الا عن طريق المفاوضات والسلام

يا زلمي ما تقاطعني خليني اشرحلك

هات اشوف

شو بقينا نقول احنا؟

بقيت تقول جماعتنا ….

اه اتذكرت .. جماعتنا في يوم وليلة قالوا ابنقدرش نكمل لانو هذول بدهم يضحكوا علينا عينك عينك.

اي هو انت مش عارف هالحكي من قبل

يا زلمي اسوق عليك الله لا تقاطعني

طيب شو صار يعني اذا قاطعتك ما العالم كلوا مقاطعنا هسة وقفت عليّ على كل تفضل

شو بقينا نقول .. اه اتذكرت هذول يازلمي ودونا على واشنطن ومصاريف وبعد كل هالتعب قالوا انو لازم نكمل المفاوضات حتى لو استمر الاستيطان

طيب وشو فيها يعني لو كملوا الاستيطان؟

كيف يا زلمي شو فيها علي الطلاق ما بخلصوا مفاوضات إلا ما بظل شبر ارض وعلى ايش يا اخوي بدهم يتفاوضوا بعديها

إمنا على أبونا شو اتعقدت هالقضية

اسمع ومش بس هيك العالم كلوا دار علينا والكل صار يضغط .. وصرنا احنا السبب في اعاقة المفاوضات ، والك حتى أوباما قال هي شو يعني خليهم يبنوا هسة خلينا نكمل المفاوضات ونشوف شو بصير .

علي الطلاق أوباما حكيوا صحيح

يا زلمي شو حكيوا صحيح أوباما ما بمون على القمة اللي بوكلها .. هسة كل هموا انو ما يطير من الرئاسة .. عشان هيك شوية هالقوة اللي عندو بدو يشد فيها على رقابنا عشان حضرتوا يظل في الرئاسة

علي الطلاق انو حكيك صح

معلوم يا زلمي حكي صح شو مفكرني بوكل تبن أنا

طيب هات اشوف وبعدين

ولا بعدين ولا قبلين . مبينة العالم بعرف انو اسرائيل ما بدها لا مفاوضات ولا بدها سلام .. واحنا بدنا ندفع الثمن .

ما افهمت عليك

يا زلمي مهو اذا اي واحد في هالعالم بدو يظرط بدها تيجي في قبتنا وبدنا ندفع ثمن هالظرطة من ارضنا واولادنا . علي الطلاق بعد كذا سنة ما بظل لا زتون ولا لوز .

وانا هاظا اللي بقولوا

وليش انتي شو قلت.

اللي بقولوا انو يا عمي احنا صرنا متخصصين مفاوضات ومن هان ليوم القيامة بدنا نظل نتفاوض وبدي اقص نص لحتي اذا اسرائيل في هذيك اللحظة بتوافق تعطينا نص متر . يا زلمي اشي بقرف وشعبنا لما شاف جماعتنا مدت على المفاوضات في هالبدلات الرسمية قلنا خلص المره هاي في طبخة . علي الطلاق انو شعبنا صار ميكل الف طبخة وما هو شبعان

انا عارف خليها على الله وشو طالع في ايدنا نسوي .

يعني لو طالع في ايدنا نسوي اشي بتشوفني قاعد بعمل تحليلات سياسية

علي الطلاق انو حكيك صح

معلوم صح يا زلمي شو مفكرني بوكل تبن

لع على سلامتك







تصميم عرب تايمز .... جميع الحقوق محفوظة
المقالات المنشورة ارسلت الى عرب تايمز من قبل الكاتب وهي تعبر عن رأي الكاتب ولا تعبر بالضرورة عن رأي عرب تايمز