د. ياسر العدل
yassadl@yahoo.com
Blog Contributor since:
24 January 2008

كاتب واكاديمي عربي من مصر

 More articles 


Arab Times Blogs
عَمُو كَمِيل

  المهندس كَميل حليم، مصرى مسيحى، عايش فى أمريكا من زمان، نشر مقال فى جريدة اليوم السابع المصرية يقول فيه للمسلمين المصريين، لو أنتم مش عاوزين الأقباط فى مصر، يبقى لازم تبطلوا استعمال أى مفردات أصلها قبطى، يعنى متاكلوش بصارة ولا مدمس ولا طعمية ولا سمك البساريا ولا البورى، ولا تزغرطوا، ولا تكسروا القُلل، ولا الواحد فيكم يسخُسَخ ولا يِلَكلِك فى الكلام، ولا يستعمل الطرابيزة ولا يِنَوُر اللًمبة لأن كل دى مفردات أصلها قبطى، ووعد بأن حياة المصريين من غير الأقباط ستكون صعبة.

  يا عَمُ كَميل، أنا بقى عندى كلام تانى، سيبك من كلام التاريخ والجغرافيا وخليك معايا، الكلام المعجمى اللى حضرتك وكثير من المناديين بأن مصر قبطية بتقولوه، أنا موافق عليه باعتباره مجهود علمى يسهل نقضه، لأن الناس تضع الأسماء على أعلام، والأسماء لا تُعًلل، وأن اللغة تكتسب معانيها بالاستخدام البشرى الحى، فانا علشان احل مشكلة المواطنة المصرية على طريقتك ممكن أقدم على حل من اثنين، الحل الأول أنى أسيب البلد وأسافر لبلاد الهمبورجر وشوربة الضفادع، اعمل هجرة يعنى، أو آكل رز مع الملايكة، اعمل انتحار يعنى، والحل الثانى أنى اعمل فيك حركة لغوية، باعتبار أن اللغة المصرية من مفهوم مقالك تعيش فى زمانها القديم وأن ظروف استخدامها لم تتغير طوال مئات السنين، شوف يا عم كميل، أنا هكتب على الطعمية سماطر، وهكتب على البصارة كشروان، وهسَمُى البورى فرابس، وهكتب اللى يعجبنى على كل الأشياء اللى حضرتك قلتها، وهفضل أعيش فى مصر، آكل الفول والبصارة والسمك البورى واللى ربنا يفرج علينا به من مستجدات اسمية، وخللى القاموس ينفعك.

  يا عَمُ كَميل، حكاية قبطى مسلم وقبطى مسيحى، أصبحت لعبة ناس عجزة وفقراء ومهضوم حقهم، ومن خوفهم بياكلوا منبر الجامع ويبيعوا مذبح الكنيسة، إحنا كلنا مصريين، والفقر والتجارة بالدين وانحسار دور الدولة جعلونا غلابة، يبقى مفيش قدُامنا غير حل واحد، إن أنا وأنت وكل المصريين الحلوين نعيش فى مصر ونبنيها، علشان الغربة وِحُشَه والموت أوُحَش، بقى يا راجل ينفع أسافر عامل تراحيل، أنام تحت عمارة ابنيها فى صحراء وأقول أهى شغلانة منها حج وعمرة؟، وإلا ينفع أهاجر سواق تاكسى فى أمريكا، ألبس برنيطة وأقول أنا مصرى تحت الطلب؟، لا طبعا مينفعش، إحنا مقامنا كمصريين أعلى من كده.

 

 يا عَمُ كَميل، أنا مسلم عايش فى مصر، وأنا وأنت شاعرين إن مصر وطن مقدس بيعيش فينا، قابلنى يا راجل علشان نعمل سواء من اجل رفعة أنفسنا كمصريين، نعيش جوه مصر أو خارجها وإحنا عارفين إن العمر واحد والرب واحد، وكلنا مع بعض نقدر نغير حياتنا للأحسن.

الاصمعي - القدس   الله الله الله يا دكتور   October 5, 2010 4:00 PM
الله ينور عليك يا شيخ, والله اني بحبك , وكلماتك هذه ذكرتني بعمي الشيخ امام:


عمي امام

عنده كلام

و مسوّح في بلاد الناس

من شوق نوله

يغزل قوله

و يغني مرفوع الراس

بلدي يا نبع النور سلسال

يسقي الفكرة للأجيال

بلدي يا لقمة عيش يا حلال

ع الأكالة وع الأكال

يا ام النيل

سايل مووايل

كل مغني و له موال

و انا ارغولي لما يموَّل سوا في الآخر

سوا في الأول

مش حيغني الا يا مصر

يا ركوبة ركاب النصر

سرقوكِ سكان القصر

و الضابط عبد المأمور

دور يا كلام

على كيفك دور
..........

adam   100/100   October 5, 2010 5:39 PM
Dear Dr. Yasser thank you very much for such article as they said you hit the nail on its head very well said nice short and voided all traps for unnessesery arguments veru clear sharp and you hit the target on the spot 100/100

سامى النويهى   كلامك جميل   October 6, 2010 3:30 AM
فعلا يادكتور ياسر كلامك رائع وجميل
البـــــلد دى بلـــــــــــدنا
مسلمــــــين واقبــــــاط
البــــــلد دى بلـــــــــدنا
واحنـــــــا فيها اخـوات
يـــــــاللى ساكــــن بره
ليــــــه تعيـــــــد الكره
افتــــــكر كــــــام مره
قلت لك هيهـــــــــــا ت
أخـــويا القبطى مصرى
وانــــــــــا زى ماليا ليه
مصر اللى عايشه فيـــا
ماهى برضه عايشه فيه
ولا دمــــــه يهون عليا
ولا دمى يهـــــون عليه
فيه ايــــد ماهش خفيه
ورا كــــــــل المشكلات
الــــــــــــدين لله ياعالم
ومصر لكـــــل مصرى
علــى مسلم أو مسيحى
ميزان العـــــدل يسرى
تراب واحـــــــــد آوينا
ونيل واحـــــــد راوينا
لـــــو روقنا واتصافينا
ح نسوى المعجــــــزات

قبطي   مقالة حميلة ولكنك   October 6, 2010 3:45 AM
كتاباتك جميلة يا استاذ ياسر ولكنك اغفلت باقي مقالة المهندس كميل التي كلها تعاطف مع فقراء مصر مسلمين واقباط وروح المودة ولا تنسي طلبة لزيادة المعونة الامريكية اكثر من مرة في اكثر من اجتماع رسمي وليس قطعها كما يدعوا كذبا ولا تنسي ان كل هم الاقباط العيش في سلام ولا يقتلوا في كنائسهم ولا يعتدي علي بناتهم من صيع ولا يتهكم احد علي كتابهم المقدس ولا يتهمهم العوااو غيرة اتهامات بلا دليل ولا يحرض عمارة علي قتلهم ولا يسبهم ابو اسلام بل يردوا ان يعيشوا في حب وعدل واخاء ومساواة
واقسم بالهي الذي اعبدة اننا نحن الاقباط نحبكم
نعم نحن نحب المسلمين لان هذا نص مقدس لدينا ولكننا نزعل علي التمثيل بجثث اهلنا في الكشح وحرقهم في بمها وقتل الشباب ليلة العيد وهم صائمون والتدليل للقتلة لكي يحدث المزيد والمزيد وضياع القانون وهذا كلة سيدفع الاقباط والمسلمين بالكفر بالقانونبل والله ايضا وخراب مصر هيا بنا الي زمن الحب الجميل قبل ان يلقنوكم كراهية الانسان وللاسف ما زال التلقين مستمرا رجاء اكتب كل مقالة المهندس كميل لتجدة رجلا محترما مهذبا ينشر الحب مثل اي مسيحي وغيرنا لا ينشر الا الكراهية فان لم يجد اخر يكرهه يكرة نفسة بينما الله محبة والله الرحمن الرحيم هياالي الحب وليس الحرب ومن معي ؟

الاصمعي - القدس   الي قبطي - رد 4   October 6, 2010 5:14 AM
من قال لك انهم مسلمين؟؟؟
هم مجموعة من السفلة والقتلة الماجورين يجرون معهم كل جاهل وتافه من عموم الناس ويعيثون في الارض فسادا.

وهذا ينسحب على كل البلدان العربية ولكن بمسميات مختلفة, اذ دائماً المجرمون لديهم اكوام كبيرة من المبررات للعبث.

تحياتي

أبو القاسم   ما قل ودل   October 6, 2010 7:51 AM
مقال جميل وهادف، وتعليقات جميلة وبنائة.







تصميم عرب تايمز .... جميع الحقوق محفوظة
المقالات المنشورة ارسلت الى عرب تايمز من قبل الكاتب وهي تعبر عن رأي الكاتب ولا تعبر بالضرورة عن رأي عرب تايمز