سامي النويهى
samyelnewihy@hotmail.com
Blog Contributor since:
10 December 2009

كاتب وشاعر مصري مقيم في مصر

 More articles 


Arab Times Blogs
السادات

الأعادى قالوا عنه

وعن ذكاؤه مجلدات

والأعاجم شهدوا انه

فوق جميع المفردات

واللى منهم كان ومنه

فرحوا جدا لما مات

واللى فينا بجد عرفه

قال خسارتك ياسادات

من كرم الله علينا

كان بايدك الأنتصار

والسلام اختارته لينا

كان ونعم الاختيار

واللى فضلوا يصدعونا

بالخيانه ليل نهار

فجأة رجعوا يبلغونا

السلام هو الخيار

الكلام دا مش كلامكم

ياترى ايه العبارة

الكلام دا عن لسانكم

وللا توجيه الادارة

السلام أصبح خياركم

ايه ح نعمل بالحجارة

آدى دقنى لو قدرتم

م اليهود تاخدم خيارة

السادات يوم انتصاره

قولتوا فيلم وتمثيلية

واما راح الأقصى زاره

قولتوا خاين للقضية

والسلام هو اللى قاله

وانتوا عارفين البقية

انصفوا الراجل تعالوا

وابعتوا لروحه التحية

قول لولدك يابن بلدى

اللى ماشافش السادات

السادات جدك ياولدى

عبقرى بكل اللغات

اللى خلى الجيش يعدى

يوم عبور المعجزات

واللى كان أد التحدى

وبرصاص الغدر مات

ياسادات ارتاح فى نومتك

انت عند الله شهيد

مصر عارفة بجد قيمتك

مصر بتحبك أكيد

واللى عارض يوم مسيرتك

كان قريب أو بعيد

نفسه يرفع تانى صورتك

نفسه ترجع من جديد







تصميم عرب تايمز .... جميع الحقوق محفوظة
المقالات المنشورة ارسلت الى عرب تايمز من قبل الكاتب وهي تعبر عن رأي الكاتب ولا تعبر بالضرورة عن رأي عرب تايمز