سامي النويهى
samyelnewihy@hotmail.com
Blog Contributor since:
10 December 2009

كاتب وشاعر مصري مقيم في مصر

 More articles 


Arab Times Blogs
حكومة بلدنا ( قصيدة بالعامية المصرية )

حكومة بلدنا بكل الوداد

بناشد سيادتك بلاش العناد

بقولها صريحه بقائك فضيحه

ياأسوأ حكومه شافتها البلاد

انسى انك انتى الحكومه الرشيدة

وشاطره بتحكم فى عالم بليده

عالم ماتعرف مزايا الحديده

وقاعده وجاهله أصول القعاد

بننكر جهودك وكرمك وجودك

نجاوز حدودنا وندخل حدودك

ونشعر بكدبك فى أصدق ردودك

وننسب اليكى سنين السواد

قوليلى وح أفضل مطأطأ وسامع

مين اللى زود علينا المواجع

 فى وجه الغلابه يرص الموانع

ويدى الحرامى قرار اعتماد

مين اللى غمض وساب الفساد

يزرّع يفرّع يطلّع ولاد

تتطور تجدد فى اسرق وبدد

واظلم وهدد حياة العباد

مين اللى وطى وضيّع هيبتنا

ومين اللى غطى بخيبته خيبيتنا

ومين اللى هبب وسوّد عيشيتنا

وعلّا اللى ساقط وشايل مواد

مين اللى فكر وخطط وباع

ومصمص عظامنا لحد النخاع

وضيّع حقوقنا بكل اقتناع

وفرط بذمه وكل اجتهاد

مادمتى بسلامتك فى ركن الحياد

وطالت معاكى ليالى الحداد

يااما تفارقى فى أقرب معاد

ياح اعلن بقلمى عليكى الجهاد

الوهراني   لا حياة لمن تنادي .   April 12, 2010 12:04 PM
تئدر تؤللي يا عم سام ؟ ايه اللي طالع بدينا وللا اللي هيطلع ! يا عمّنا . حضرتك بتنادي على اصنام ومن امتى الصنم بيسمع . ابونا ابراهيم عليه السلام حطّمهم . ورسولنا ايضا عليه الصلاة والسلام . حطّمهم مع اصحابه . اللا مننا نازلين تمجيد بيهم في كل ساعة وبدون مناسبة . ألم تلاحظ عزيزي انك تنادي من لا حياة لهم

زياد السلوادي   تحية للأخ الأستاذ سامي النويهي   April 12, 2010 5:45 PM
عمرك شفت حكومة بتستقيل؟ ولا حتى وزير واحد استقال ؟ صدقني الشعب ممكن يستقيل وتظل الحكومة باقية
يبدو انك ح تجاهد وتجاهد سنين طويلة


قصيدة رائعة
وأعجبني جدا هذان البيتان

عالم ماتعرف مزايا الحديده

وقاعده وجاهله أصول القعاد

تحياتي لك وفي انتظار المزيد من روائعك







تصميم عرب تايمز .... جميع الحقوق محفوظة
المقالات المنشورة ارسلت الى عرب تايمز من قبل الكاتب وهي تعبر عن رأي الكاتب ولا تعبر بالضرورة عن رأي عرب تايمز