شرف يافتح الباب
رب العباد تواب
موّت ضميرك موّت
واتغطى بالأسباب
سليم وفت خدوك
وعضم هش رموك
وبكام جنيه كافؤوك
ومعاش قانون الغاب
فى بلدنا قول يابلاش
رب المعاش ان عاش
ياف ضنك ياف انعاش
وصاحب بالين كداب
سابوك وفين ح تروح
والظلم فين ماتروح
ياروح مابعدك روح
ح يبقى موت وخراب
أمن طريقك أمن
عشان تعيش مطمن
وان قالوا بكره يحنن
يبقى مالكش عتاب
ح تبكى ليه وتعدد
وتعيش لامتى تسدد
اسرق بلاش تتردد
واسرق بغير حساب
وبأى اسم ان كان
الهف وقول دخان
ولو ضميرك خان
قول تبقى دى أتعاب
منتش حرامى دا مالك
مال الحكومه حلالك
واللى يضر عيالك
ملعون فى كل كتاب
الكل ماشى يقصقص
وخلاص بقيت متخصخص
وبدال ماعضم تمصمص
خليـها تبقـى كبـاب
