ماهر دريدي
maherdj@hotmail.it
Blog Contributor since:
07 March 2010

 More articles 


Arab Times Blogs
حوار مفترض مع وزير

في غرفة مربعة 5 * 5 متر ، كشاف ضوئي احمر معلق في فضاء الغرفة ، في وسط الغرفة دائرة 3 * 3 متر يقف الممثل س مقابل الممثل ص في حوالى الساعة السابعة مساءا من يوم الخميس .

 س : بشرفك لو انك وزير الاقتصاد كان شو بتسوي ؟

ص : بحط في جيبتي كذا مليون .. وبعدين بعمل لجنة لمراقبة الاختلاسات والفساد .. يا اخي ما في حدا فوق القانون .. اللي بسرق بدها تنقطع ايدوا !!

س: والله برافو .. مبين عليك شفاف كثير .. بدك الصحيح اللي على راسو بطحة بحسس عليها ، وكيف لو انك وزير داخلية ؟

ص: بدخل الجميع جوى سجن كبير وبسكر عليهم وبروح ، على فكرة اللي بخالف القانون بدنا نسلخ جلدو واللي ما بخالف القانون برضوا  بدنا نسلخ جلدو .. ما دام في عدل لازم يلاحق الجميع .

س: والله ونعم العدل كيف لو انك وزير الخارجية ؟

ص: بقضيها الف  في العالم حتى ازهق .. العالم كبير وبستحق انشوفوا قبل ما يغيروا الحكومة .. و بجوز اصير بعديها وزير المواصلات شو بدرينا شو الدنيا مخبيتللي .

س : والله نعم الاختيار ، بس ناقصك تصير وزير البنية التحتية .. بدي اشوف شو بدك  تسوي

ص: اي هو عنا بنية تحتية بالاصل .. حتى لو في عنا زي ما بتقول .. الدبابات بتهدها بين كل فترة وفترة .. بتعرف لو اصير وزير البنية التحتية شو بسوي ؟

ص: اه شو بتسوي ؟

س: بلعن سنسفيل المجتمع الدولي

ص: ليش يا زلمي ، شو مساويلك المجتمع الدولي ؟

س: بلم منهم مليارات عشان اعمل بنية تحتية ولا في زيها في باريس .. وهيك لما بتيجي الدبابات بتهدها .. برد بلم فلوس كمان مرة وبرد اعمل كمان بنية لحد ما تزهق الدبابات … المجتمع الدولي سخي واحنا بنستاهل .

ص: انا نفسي اصير وزير المصانع وتشغيلها !

س: والله هاي جديدة .. شو بدك تسوي فيها

ص: والك بدي اظل اعمر مصانع واشغلها لحد ما نصير مجتمع صناعي .. والك اوروبا احسن منا بشو ؟

س: اوروبا عندها مصاري وانت شو عندك ؟

ص: احنا عنا ايدي عاملة ومشان نشغلها بنطلب مصاري من اوروبا ! افهمت ؟ احنا ملحلحين والعالم سخي .. مزبوط ؟

س: اتخيل لو انك تصير رئيس الولايات المتحدة .. شو بتسوي ؟

ص : والك بخلي العالم كلو يشتغل تحت ايدي وبخلي شعبي يتدلل … مش العالم كلو عبيد عند الولايات المتحدة ؟ معناها ممكن العالم يصير عبيد عندي وعند شعبي !!

س: أي شعب ؟

ص : مش عارف بصراحة …

س: الشعب اللي بموت بتسميه شعبك .. ولا الشعب اللي بحلم يكون حر وما فيه يصير حر ولا حتى في الحلم !!

ص: شعبي انا شعب المدينة الفاضلة تبعة افلاطون

س: مش موجودة يا صاحبي ، ولا حتى افلاطون موجود !

ص: تخيل انك واحد من هالشعب الغلبان شو بتسوي ؟

س : بظل حاطط ايدي على خدي وصافن الى الابد

ص: صافن تستنى شو

س: بستنى غودو يجي يخلصنا من هالقرف !!

ص: قرف شو ؟

س: والك شو قرف شو .. لما بنوصل لحالة انو نفقد قيمتنا كأنسان ، بظلش للحياة اي معنى … ما تستغرب اذا بقلك هالقصة

ص: هات اتحفنا !!

س : مرة كنت ماشي في شارع مضوي ، ضو اصفر .. شارع طويل .. وما كان حدا في الشارع غير انا وكلب مشرد ما الو بيت ، كنت ماشي في منع التجول .. حالتي النفسية مأسوية ، وحاطط ايديّ في جيابي .. وبصفر من القهر … ما بفكر ولا بأي شي ، فوق السطوح كان في قناصة .. انا كنت عارف انهم ممكن يقنصوني بدون اي مقدمات .. ما وقفت عن المشي ولا اني اطلعت لفوق .. وفي لحظة مرق في ذهني مشهد مأساوي .. مشهد انو واحد من القناصة صوب نحوي بثلاث طلقات ، وحدة في الراس ووحدة في البطن والاخيرة في الظهر .. وين ما احط ايدي على جسمي بلاقي دم عبى الجسم .. بوقع على الارض بشكل بطيء بدون ما ابكي على نفسي او اصرخ على حدى بنقذني ومتت زي ما بموت اي حدى في مكاني !!! اتخيل بعد ما اتخيلت هذا المشهد فرطت على حالي من الضحك .. وظليت امشي لحد ما اوصلت اخر الشارع وما متت !!!

ص: ولو انك متت شو بدو يتغير اشي في الوضع ؟

س: ما بتغير اي شي .. عادي الالاف ماتت قبلي ومازلت بتموت … وما بتغير شي .. الموت عادة يومية … وبتقللي انتي ليش غلبان !!

ص: طيب شو رايك في وجبة صمت تريح فيها حالك وانا كمان اريح حالي شوي قبل ما نتخيل مشهد جديد !!

س: برضو بصير

 انتهى المشهد 







تصميم عرب تايمز .... جميع الحقوق محفوظة
المقالات المنشورة ارسلت الى عرب تايمز من قبل الكاتب وهي تعبر عن رأي الكاتب ولا تعبر بالضرورة عن رأي عرب تايمز