From : waelabbas@hotmail.com
Sent : Thursday, December 30, 2004 5:11 PM
To : arabtimesnewspaper@hotmail.com
Subject : زلزال اسيا هل يهز كروش الخليج؟؟؟
 



زلزال اسيا هل يهز كروش الخليج
بقلم : وائل عباس



فعلا انا مخنوق ومفقوع جدا من الناس اللي بتتقول على رب العباد كده من غير علم وبتفسر تسييره للدنيا على مزاجهم وحسب اهواؤهم للترهيب او الترغيب وكانهم وحدهم يمتلكون العلم ويتكهنون بالمشيئة الالهية !!! يقولك اصل الزلزال ده غضب من ربنا علشان الدعارة في تايلاند ولا ابصر ايه
مع ان معظم الدول المتضررة دول اسلامية كاندونيسيا وماليزيا والمالديف وغربا عمان وحتى الصومال وماليزيا دي مثلا لو لفيت فيها سيجارة بانجو تخش السجن ولو حتى كنت ابن الرئيس بوش وايضا مع ان اكثر دولة تضررت وكان منها ضحايا هي سريلانكا وهي دولة نامية تعبانة لا ليها في الثور ولا في الطحين ولا فيهاش سياحة من اساسه

واطرف تعليق قراته لاحد المتفزلكين هو ان الزلزال سيؤدي الى بطء دوران الارض  ثم انعكاس دورانها لتشرق الشمس من الغرب وهي احدى علامات الساعة !!!
اعتقد انه يقرب الى عائلة زغلول النجار ولو فكريا ... ومتفزلك اخر زعم تواطؤ امريكا التي عرفت بموعد تسونامي قبلها بثلاثة ساعات  وكفت على الخبر ماجور ولم تخبر به احدا ... اخص عليها ... واخر ذهب الى ابعد مدى فاتهم امريكا بتجربة سلاح فتاك جديد رهيب نجم عنه هذا الزلزال واخر اقل هوسا منه عزى الامر الى شفط البترول من باطن الارض اللي بقت واقفة على مافيش !!!

وانا لا اشك ابدا ان وراء هذا الهبل مشيخات النفط المتخمة بفلوسها  حتى لا يتبرعوا لاعانة اخوتهم في الاسلام بحجة انهم بتوع سياحة الدعارة ... اخيه عليهم ياله من موقف مخز يدعو للاسف من اصحاب الكروش الممتلئة يفضحهم امام شعوبهم وامام العالم مع ان اسرائيل تبرعت وارسلت وحدات انقاذ ومساعدات وكذا فعلت فرنسا وماما امريكا وبريطانيا ثم بعد ذلك تسمع مشايخهم يتحدثون عن التنصير وافعال الجمعيات الخيرية المسيحية بكل وقاحة ها نحن ذا فيها وكما يقول اهل بلدي ... المية تكدب الغطاس !!! فأتوا ببرهانكم ان كنتم صادقين ...

هم نفس الناس برضه اللي لما الجراد الاحمر زارنا في مصر قاللوك ده غضب الله على شعب مصر علشان بيتفرجوا على نانسي عجرم وهيفاء وهبي او اي هيافة من اللي قالوها ساعتها ياريت ترحموا نفسكم وترحمونا وتبطلوا حرق البخور ووشوشة الدكر وضرب الودع علشان تقولولنا ربنا بيقول ايه وعاوز يبعتلنا انهو رسالة ربنا ما عملكوش جهاز الفاكس اللي يبعت بيه رسايله لنا اعتقونا لوجه الله من تفسيراتكم المضحكة وانظروا كيف اخترعوا جهاز للتنبيه بوقوع الزلازل قبلها باربع ساعات ياريت يطلع من كوعكم حاجة زي كده هو زغلول النجار ما اكتشفشي حاجة في القرآن يعملوا بيها جهاز زي ده؟؟؟
هذا طبعا ليس سخرية من كتاب الله حاشا لله ولكن سخرية ممن يحملونه ما ليس فيه افتآتا على الله