From : T R <tawfiq53@hotmail.com
Sent : Thursday, December 23, 2004 1:43 AM
To : arabtimesnewspaper@hotmail.com
 

عَ بالنا الباشا باشا
أثْريتو الباشا زلمة
شعر : توفيق رحايمة
خاص بعرب تايمز

عَ بالنا الباشا باشا
أثريتُو الباشا زلمة
كل يوم يطلع عالشاشة
وبحركاته الغشاشة
بِغْسل مُخ الشعب الصامد
بِدّو يعمل حالو قائد
عم يخدعنا
وعم يلدغنا
ومن طيبتنا صدقناه
وما كنا عارفين نواياه

كنا بنبني عليه آمال
للتحرير وللنضال
ولمقاومة الإحتلال
ولمعارك الجبال
لكنُّه خيب أملنا
وضيّع إلنا كل احلامنا

بِرْفع إيدُو بْكَلبشات
للتصوير وللكاميرات
وعامل حالُو عم بيعاني
ومَليان وطنية وتفاني
وعامل حالو شايل هموم
وعايش عالمُرْ والزقوم
شو هالعيشة يابو هموم
زنزانتك خمس نجوم
فيها ساوْنا وفيها دِش
وتلفون دولي وفيها سويتش
شو هالعيشة يا حرام
نايم عَ ريش النَّعام
من شو بِتعاني يا مسكين
عايش عيشة سلاطين

كنا بنهتف لك ونصيح
لما قررت الترشيح
خبّيناك لوقت الشِّدِّي
لَنْحقق هالحلم الوردي
لكن هالفلم اللي مَثَّلتو
بايخ مثل الفلم الهندي

خذ مني الحكمة يا مروان
مهما يغويك الشيطان
ذيل الكلب بِظَلّو أعوج
مهما تْشِدّو رح يِتْطَعْوَج
كَرْتَكْ إنتَ حَرَقتو بإيدك
كل أفلامك ما بِتْفيدك
سيبك من هالمسرحية
ومن شُغُلْ هالهيلَمْجِيّة
سِيدَك بِظَلّو الخواجة
يا (شاهد ما شفش حاجة)

لَكِنّا بْنِرْجع وِنْقول
شُغْل الهِيلَمِة ما بِطول
ِبْنِحْمِد ألله إنّا عْرِفناك
وِعْرِفْنا حقيقة نواياك
وراح تظلك ليل نهار
من تلاميذ الختيار
ومهما هالتلاميذ كثار
بِظَلّوا رسن الحمار
وما رح ننسى اللي فات
وإنك تِرْبايِة عرفات