آآآه يا... وطن
توفيق رحايمة

كِلْمِة آه ما عادت تنفع
مَحْنا صرنا ببوز المدفع
كل ما نحكي كلمة صريحة
بِعْتبروها كلمة قبيحة
ليش ما نسمّي كل شي بإسمُه
ونفصّل له البدلة عَ كَسْمُه
ليش بِتْسَمّو الخائن رمز ؟
كيف شلاطي يحرس كنز؟
وليش بتسَمو اللص قائد
على جثث شهداءنا قاعد
وليش بتسموهم ثوار
وهُمّة عونطجية كبار
سميتوا الدجال مناضل
وعِ الهزايم طالع نازل
ومش شاطر غير في التبويس
والكازينوهات والطعاريس
من يومو وهوِّ خسيس
أنجس من ذنب إبليس..
وشو هالذكا يا رئيس
تبادل القدس بأبو ديس !
وِبهالعَمْلِة يا رئيس
أثبتت إنك أكبر تيس


الحرامي إسمه حرامي
مهما ندافعلو و نحامي
واللي بتنازل عن أرضُو
بكرة بتنازل عن عَرْضُو
والأبوات تنازلوا كثير
من يوم ما لِبْسوا الحرير
ونِسْيوا شي إسمو تحرير
وصاروا يصَلّو للدنانير
ونِسْيوا شكل المولوتوف
لما باعوا الكلاشنكوف
عَ كراسيهم صاروا يخافوا
وكل واحد لابِدْ بِلْحافو

كيف بِدنا نسميهم قادة
وتاريخهم سِرْقة وِشْحادة
وختيارهم أكبر دراكولا
مَصْ دَمْنا مثل الكولا
وما صدّقْنا إنّو غار
عَ جهنم تِشويه النار

وابو مازن باع البرستيج
ورِجِع يِشحد في الخليج
بَلَّش يِصْدِر إعتذارات
بِدّو يقلد إللي مات
واللي مات كان راكب راسو
ما خَلَّلا جحش ما باسو
إعتذاراتك يابو مازن
للخليج وللصهاين
رَفْضَتْها كل الشعوب
أشرف لك ترجع وتتوب

كيف ترمي الحجر في البير
وياما شربتوا منّو كثير
إنت وختيارك الكبير
ولَمّيتوا منّو الدنانير
بِسم الثورة والتحرير
كيف تناصر مجرم غازي
كيف تؤيد الانتهازي
شو استفدتوا من صدام
لما عَملتوه إمام
ما جبتولنا غير العار
لما مشيتوا ورا الحمار
طَبَّلْتولو و زَمَّرْتولو
وصور المجرم رَفَعْتولو
ونسيتوا شعب فلسطين
وصُرْتو تْحِجّو للرافدين

كل مجرم إلو نهاية
مهما بِتْطُول الرواية
واللي ما بِفْهم في التاريخ
أحْسَنْلو يعيش في المريخ
ويِتْعَلّم فن الطبيخ
وبَلا كراسي بَلا بطيخ