From : heshamatt@hotmail.com
Sent : Saturday, December 24, 2005 8:42 PM
To : arabtimesnewspaper@hotmail.com
Subject : مصر في الغربة ..رباعيات بالعامية المصرية 
 

مصر في الغربة
رباعيات بالعامية المصرية
هشام عطية



وبحب بردك يا مصر أنا عن دفا الغربة

وبحب عيشتك يا ريتني ما عشت ف أروبا

وأحب شمسك ولو يخفيها مليون ليل

وأحب أرضك ولو كانت ضلام تربة

.........................

مصر أللي طول عمرها أبدا مهيش بارده

مصر أللي طول عمرها وسط الأمم ورده

مغرباني هنا وحدي لضيق الحال

وهيَا دايما دراعها للغريب فارده

.........................

يا مصر أبنك وبيودك ولا تودي

وأنا اللي أحبك تروحي تعشقي ضدي

هوا كدا الود يعني ؟ دي المحبه خلاص!

تملي دايما كدا ....حظي على قدي

.........................

يا اللي زرعت البلد معلش صح النوم

وإن جعت تفطر بصل وأتغدى فصَين توم

وأقعد أسمع بقى حكمة بلدنا اليوم :

اللي زرع يتقلع واللي سرق مكروم

............................

يا اللي بنيتها بنيتها ؟!طب خلاص تشكر

وأقعد أشرب بقى شايك بلا سكر

وخف رجلك ويالله قوم بقى روَح

دا اللي بيبني ف ترابها آخره متعفر

............................

يا موظفين البلد أوصيكوا بالسرقه

حترتشوا أرتشوا ..برضك مهيش فارقه

وسيب ف شغلك زمن وألبد في فرن العيش

عشان خمس أرغفه وآخرتك علقه

...........................

وبيعي ف أم الخلول يا مَه وبيعي لبان

وبيعي حمص ولب وخس وبدنجان

غيرك يبيع مصر تدعي له وتفرح بيه

وأنتي آخرك يا قهر يا قبر يا مورستان