|
From :
Sent : Friday, September 2, 2005 5:16 AM
To : "arabtimesnewspaper" <arabtimesnewspaper@hotmail.com>
Subject : من السفارة الفلسطينية في واشنطن حتى محسوم اريحا
السلام عليكم
قرات الخبر المنشور في الشريط الاخباري عن السفارة الفلسطينية في واشنطن
والمليار وربع!
اول ما خطر على بالي قصة حدثت لي شخصيا مع السفارة قبل ثلاث سنوات لا زلت
اذكرها
انا من حملة الهوية الفلسطينية واحمل جواز سفر فلسطيني صدر في غزة مع قدوم
السلطة سافرات لامريكا للعمل وبعد ثلاث سنوات
انتهى مدة جواز السفر المحددة بثلاث سنوات احمل
الجواز الامريكي ولكن حتى لا اخسر الهوية عملت على ان يكون جواز السفر
الفلسطيني ساري المفعول قلنا يا ولاد مالك الا
سفارتك في واشنطن دخلنا على قوقل وبحثنا عن
التلفون والعنوان
ترن ترن
الووو
السلام عليكم
وعليكم السلام
اخي انا مواطن فلسطيني عايش في امريكا ومعي جواز سفر فلسطيني انتهت مدته من شهر
شو مطلوب مني حتى اقدم معاملة تجديد الجواز؟
بدك طلب من عندنا وصورة عن الجواز ونوتري ببلك وطوابع و150$ رسوم المعالمة
حلو .طيب متى بيرجع الجواز من التجديد
انت بتبعث لنا المعاملة في البريد وبنعمل لك الطلب وبنرجعه لك وانت بتبعثه على
غزة!!!!!
هذا الي حصل بدهم منى 150$ وانا ابعثه واتغلب فيه على غزة
طيب لليش السفارة اذن من اصله
المهم كنت انا مش سائل حد عن هذا الموضوع وكيف بتصير معاملات التجديد
المهم قلت له ماشي انا موافق ممكن تبعث لي فاكس شو مطلوب منى وعنوانكم والا سم
الي بكتب له الشيك حتى اعمل المطلوب منى وابعثه لكم مع البريد السريع (فدكس)
للاسف والله الفاكس عندنا خربان !!!!!!
هذا الجواب الي جائني من الموظف الي نسيت اسمه بس اعتقد لمى ذكر اسمه سالت عن
عيلته قالو من بيت لحم
سفارة طول وعرض ومليار وربع مليار
دولار والفاكس خربان
المهم اجت منهم ما اجت منى تركت جواز السفر كمان 3 سنوات بدون تجديد
واخيرا بعثت وكالة لاخوي في الضفة جدد لي الجواز خلال 3 ايام والرسوم مع الشحن
وتكلفة الوكالة والرسوم للمعاملة تقريبا 50 دولار
الان زرنا فلسطين وشفت شوفات الله لا يوريكم
بعد ما وصلت البلد بيومين قلنا وين يا شباب قالوا على رام الله
وصلنا رام الله
على دوار المنارة الطخ اشتغل لابو موزة
نزلنا في الارض قلنا اليهود احتلوا رام الله
بتعرفوا شو طلع يا شباب ؟
ثلاث مسلحين معهم رشاشات ام 16 طخطخوا كل واحد فيهم مشط في الهواء وفي الاخير
صاروا يوزعوا بيانات عشان في مسيرة بدها تصير بعد يومين ابصر عشان شو
نمرة صفراء وجواز امريكي وفيزا وبقول انا في شهر عسل هسى على المحسوم (حاجز
عسكري اسرائيلي ) بمر من عندهم بدون والا سؤال والا جواب
واين رايخ
رايخ على القدس بدي اصلي
طيب صف على الدور مثلك مثل غير
يا عمي انا معي جواز سفر امريكي وفيزا
صف على الدور وبلا كثرة حكي
محسوم قلنديا يا شباب تقول عنه معتقل بيشتغل بالساعة
النسوان بتمر والشباب اقل من خمسين سنة كله بيصف على الدور ان شاء الله جاي من
فرنسا مثل السايحين الي كانوامعنا على الدور
المهم بتوقف على الدور بيجي دورك بتدخل باب حديد دوار بتدخل فيه بيلف اخو
الشليتة الجندي بسكر عليك بتصير مثل الي لا هي مطلقة والا معلقة
الاسم المعروف له هذا الباب معاطة الجاج (دياي عند اخوانا في الخليج) وفراخ عند
اخوانا المصاروة
وعلى هل الموال كل محسوم بده يعرف من وين رايح ومن وين جاي وليش وكيف وتفتيش
تقول انك داخل مفاعل نووي قرف يقرفهم
ليلة من الليالي وين يا شباب قالوا على اريحا
المهم رحنا طريق القدس اريحا بسيارة نمرة صفراء بتمشي على خط التسعين وبتدخل
اريحا
محسوم ! وين رايخ
على اريحا
لا ما بتقدر انت نمرة صفراء وبنخاف عليك من الريحاوية !!!
اكوي والك شو هاظ يا زلمة اليهود خايفين علينا من الريحاوية قلنالهم لا تخافوا
احنا عرب مثلهم وما بيصير شي
المهم تركونا
بعد 200 متر من الحاجز بتوصل للحاجز الفلسطيني للدخول لدولة اريحا المعظمة
بيوقفك جندي قرفان حاله وبيدخن (على فكرة كل الجنود الي في اريحا لا شغلة والا
عملة دخان وارغيلة على الحاجز وبس )و سالنا الجندي الفلسطيني بالحرف الواحد
شو سئلوكم على الحاجز الاسرائيلي !!!
ههههههههههه و هات يا ضحك الجندي من الطفر مش عارف شو يسال سالنا عن المفاوضات
مع الجندي الاسرائيلي على الحاجز
قلناله والا شي بس قال الريحاوية بخوفوا
نفخ حاله الجندي تقول طاووس وقال اكيد يا عمي مش شايفينا واقفين الهم على
الحدود
عاد البرودة(الرشاش )الي معه بس يطخ طلقتين بيحمى وبيصير يبزق الرصاص على بعد
متر منه
شو بدكم في طولة السيرة قعدت ثلاث شهور في البلد انبسطنا فيهم وغيرنا جوا
باذن الله راح ازور فلسطين كل عام مع المشاكل ومع البهدلة بس مثل بلادنا ما في
اكثر منظر احزني
الجدار العازل الله يلعن ابو اليهود على اليوم الي شفناهم فيه البلد عملوها سجن
كبير
اخيرا
انا فلسطيني وهذه الرسالة بلغة عامية بحتة لم اتصنع فيها ولم ابحث عن الكلمات
والمفردات المناسبة لانه اردت ان اوضح لكم ما حصل معي بالضبط في رحلتي الى
الحبيبة فلسطين
لو سمحت شيل الاسم والبريد بلاش يحرمونا من الزيارة مرة ثانية
وتحياتي لكم
|