From : hala_23_eg@yahoo.com
Sent : Sunday, September 11, 2005 4:28 PM
To : arabtimesnewspaper@hotmail.com
Subject : جمال كويزومي
 

جمال كويزمي
بقلم : مواطن مصري

 

فيه انتخابات فى اليابان دلوقتى وبعد اسبوعين انتخابات فى المانيا، شفنا مرشح رئيسي ادام كويزومى ، ومرشحة ادام شرودر، مش 10 مرشحين 7 منهم مكملوش 5000 صوت كانوا مترشحين عشان يلهفوا نص مليون جنيه، وشفنا مناظرات بين المرشحين فيها المرشحين واقفين لمدة ساعة ونص من غير تعب لان مافيهومش حد داخل على ال 80 سنة

 

 والتليفزيون بيعد كل واحد اتكلم كام دقيقة، وفيه مذيعين بيسألوهم اسئلة تهم الناس ومشاكلهم دلوقتى مش بيسجلولهم كلمة للتاريخ عن الضربة الجوية من 32 سنة، وكأنه هو اللى خطط للحرب وبعدين ركب الطيارة وضرب الضربة وبعدين رجع وفتح الفتحة مع المهندسين وبعدين عدى من الفتحة ورفع العلم مع المشاه، بالمناسبة حد يعرف مين قائد القوات الجوية دلوقتى!

 

 وشفنا استطلاعات رأي بتقوم بيها مؤسسات بتفهم فى علم الاحصاء مش واحد بينزل الشارع يسأل خمس انفار ويسميه استطلاع رأي، وشفنا المرشح بيقدم كشف حساب وعد بايه وحقق ايه ، مش بيقولهم هوفرلكم 4 مليون فرصة عمل وحكومته لسة مصرحة ان البلد مافيهاش غير 2.5 مليون عاطل

 

 وماشوفناش ناس بتبيع أصواتهم ب20 جنيه أو نص فرخة، وبعد كدة يصوتوا للى كان السبب فى فقرهم واحتياجهم للعشرين جنيه وشكواهم من غلاء المعيشة مع ان اى سائح بيحب ييجى مصر بيفتح حصالة ابنه

 

 وشفنا كويزومى شعره ابيض وشرودر بيقول انه هيقاضى اى حد يقول انه بيصبغ شعره لان ده فيه اتهام بالكذب، مش بيصيغ شعره ويحط أحمر شفاة أو ينشر صوره من 30 سنة لما كان شاب فى الخمسينات

 

 وشفنا المرشحين لازم يثبتوا لشعوبهم ان مدخلش بيتهم مليم حرام وماستغلوش مناصبهم بأى صورة وانهم مبيقبلوش الحرام على عيالهم لان ما نبت من حرام فالنار أولى به، وماسمعناش ان جمال شرودر أو جمال كويزومي بيتصرفوا كأنهم ولاد صاحب العزبة ياخدوا اللى هما عايزينه ويعينوا رئيس الوزا اللى هما عايزينه ويشيله اللى هما عايزينه أوبيفكروا يورثوا عزبة بابا

 

 المقرف ان مافيش شعب عربي اختار رئيسه من ايام الخلفاء الراشدين، امتى بقى هنبقى بني آدمين زيهم، امتى بقى، امتى.