From : Cindy Askme
Sent : Tuesday, August 30, 2005 9:48 PM
To : arabtimesnewspaper@hotmail.com
 


يا ترى مين اللى هيروح انتخابات الرئاسة المصرية؟

د/ مصطفى الحسيني

 



تعالوا نشوف مين ممكن يروح يصوت فى انتخابات الرئاسة، أعضاء حركة كفاية هما أجدع ناس فى مصر ودول مقاطعين الانتخابات ومش هيكلموها تانى خالص

 

 الحزب الوطني صاحب شعبية جارفة بين الشباب لان العضوية فيه بتأهلك لطلوع رحلة اسبوع لاسكندرية ب 15 جنيه على حساب وزارة الشباب وممكن كمان تاخد تي شيرت عليه صورة الشاب الوسيم اللى عنده 77 سنة وعليه ضحكة ترد الروح، حزر فزر مين؟ ودول خلاص خدو اللى هما عايزينه

 

 أحزاب التجمع والناصري مقاطعين الانتخابات،

 

حزب صوت الأمة رئيسه أحمد الصباحي اللى قال انه لو كسب الانتخابات هيتنازل عن الرئاسة لحسني مبارك، الراجل ده بفى حسبها صح، بعد ما لهف النص مليون بتوع الدعاية قال انه هيتنازل عشان مافيش حد يسأله عملت ايه بالفلوس يا .........؟

 

 فيه 6 أحزاب تانية مش عارف اساميهم ودول عدد أعضاءهم مجتمعين ميكملش 50 نفر، واحتمال بعض رؤساء الأحزاب دي يهربوا بالفلوس قبل الانتخابات

 

 حزب الوفد آخر خبر المصريين سمعوه عنه ان سعد باشا زغلول وعبد العزيز باشا فهمي وباقى أعضاء الوفد سافروا انجلترا يتفاضوا مع الانجليز من أجل الجلاء التام أو الموت الزخام، وبالمناسبة عبد العزيز باشا فهمي الله يرحمه ويبشبش الطوبة اللى تحت راسه من مواليد كفر المصيلحة وهو السبب فى اللى احنا فيه ده كله لانه كان الواسطه بتاعة حسني مبارك للالتحاق بالكلية الجوية

 

 رئيس الوفد نعمان جمعة سقط فى انتخابات مجلس الشعب وقال كلام ميطمنش من نوعية ان هو وحسني مبارك أصدقاء ومن أسر فقيرة وكان ناقص يقول انه هيتنازل لو كسب الانتخابات هو كمان

 

 نيجي بعد كدة للشباب ودول بيسهروا طول الليل يتفرجوا على بوسي سمير وروبي ومبيصحوش من النوم الا الساعه 5 يعنى مش هيلحقوا الانتخابات أساسا

 

 العمال والموظفين مابيصدقوا ياخدوا يوم أجازة من الشغل لاننا البلد الوحيدة اللى الموظف فيها بياخد يوم واحد بس أجازة فى الاسبوع ودي حاجة طبيعية نظرا للمرتب الخيالى اللى بياخدوه

 

 الفلاحين بيروحوا الغيط من الفجر لحد المغرب يعنى مش هيلحقوا برضه، وعلى العموم هما حتى ما يعرفوش ان فيه انتخابات

 

البدو فى سينا كلهم محبوسين فى أمن الدولة وبيصوتوا ليل نهار يعنى مش محتاجين لجان يصوتوا فيها

 

 يعني أغلبية الشعب المصري هيتابع الانتخابات على قناة الجزبرة طبعا لان التليفزيون المصري هيلم 100 واحد من أبو الواحد ب 20 جنيه وهم بيهتفوا لحسني مبارك وبعدين يصورهم فى لجنه تانية وتالتة ويقولك ان الاقبال فاق كل التوقعات، وهما بيتفرجوا هيقعدوا يسألوا بعض تفتكر مين اللى هيكسب انهاردة!

 

 نيجي بقى لنجم الحفلة، وزارة الداخلية، ودول هيبدأوا شغل من ليلة الانتخابات، نصهم هيروح يقبض على الاخوان المسلمين والناس الوحشة اللى مش هتنتخب الريس، النص التانى هيقفل صناديق الانتخابات حسب اعترافات واحد كان زميلى فى المدرسة شغال عسكرى فى المركز. أما شغل يوم الانتخابات فده شرحه يطول ومحتاج ييجى 50 صفحة فلوسكاب.

اشارات:

- أرجو من أعضاء اللجنه التى سيصوت فيها الرئيس أن يطلبوا منه ابراز بطاقته الانتخابية أو الرقم القومي عملا بمبدأ المساواه

- اللجنه العليا للانتخابات رفضت الرقابة من أي منظمة على الانتخابات لان فى ذلك اهانة للقضاة، طيب ممكن يراقبوا على اللجان اللى مافيهاش قاضي (مصر فيها 14000 قاضى و52000 لجنه) ولا ده فيه اهانة لمين؟ يا ريت يبطلوا اهانه لعقولنا

- كان من الممكن مبايعة الرئيس مدى الحياه (ودي مدة أقل من فترة رئاسية جديدة) وتوفير حوالي 50 مليون جنيه وده مبلغ يكفي شراء 3 سندوتشات فول أو علبة كشرى لكل مصري. وسلملي على أزهى عصور الديموقراطية.