From : adel_imam30@hotmail.com
Sent : Friday, January 14, 2005 3:21 AM
To : arabtimesnewspaper@hotmail.com
Subject : رد على ابراهيم الجندي
 

الساده عرب تايمز المحترمين ، أرجو نشر الرد التالي على مقال ابراهيم الجندي بعنوان المذبحه و لكم الشكر .

لا يفتأ الأخ ابراهيم الجندي ، يتحفنا بمقالاته المنتقده للذات الألهيه ، و لا أقل منها بملي متر واحد ، من انكاره لعلم الله الى انكاره وحدانيته ، الى انتقاداته المستمره لكلام الله ، دون أن يتكرم علينا ولو لمّره ، فيشرح لنا سبب خصومته مع رب العزه لا اله الا هو !
"لا يفتأ " يا ساده يا كرام ، من أخوات " ما انفك " و "ما برح" و "مازال " ، هيّه على بعضيها كده ، عيله مش ولا بد ، بس احنا ما بنحبش نجيب في سيره الناس .
الناس بأه هيه اللي مش عايزه تجيبها البرّ وايانا ، خودوا مسلآ ، الصحافي العزيز ابراهيم الجندي ، بالّزمه بأه كده على بلاطه ، كم واحد في الدنيا سمع بيه ؟ انما اللي دايمآ يجيب في سيرتو ، ربنا تبارك و تعالى ، قولولي مين ما سمعش بيه ؟
يا عمنا ابراهيم ، ما توحد الله بأه و كفايه ، انته مصمم تخلي طريقك مع ربنا زي ما قال حليم : مسدود مسدود مسدوووووود يا ولدي ؟!
المقاله بتاعتك دي ، لو تكبرمخك شويه ، تلاقيها مالهاش لازمه خالص : المفروض انك صحفي ، يعني شغلتك كتابه و قرايه ، و اللا انته ما ليكش في القرايه ؟ بتكتب بس ، معقوله عمرك ما سمعت في حاجه اسمها التراجيديا ؟
دول حبايبنا الأغريق ، طلعوا في حاجه اسمها المأساه الألهيه ، و قالوا بما معناه ، ان المأساه لا تنشأ من صراع الحق مع الباطل ، انما تنشأ من صراع الحق مع حق آخر مثله .
القصه اللي سيادتك معكننه عليك عيشتك ، هيّه بالزبط كده ، الصراع اللي نجم في عقل ووجدان سيدنا ابراهيم عليه السلام ، مش انته ، الصراع اللي نجم من حق ربنا في الطاعه و حق الأبوه في الرحمه ، دي ، علشان تفرفش شويه نكلمك عن حد انته بتحبه ، ابليس ، لعنه الله عليه _ حتى و لو كان حبيبك ، في من زنادقه العرب من رأى أن ابليس واجه تراجيديا الهيه سابقه على تراجيديا سيدنا ابراهيم عليه السلام ، لأن ربنا لما أمره بالسجود لآدم عليه السلام ، رفض ابليس بدعوى أن السجود لغير الله كفر لا يطيقيه ! كده دافع عنه تلامذته ، لو رجعت لكتاب تلبيس ابليس ، و اللا انته صحيح ما بتقراش ، كنت عرفت الحدوته دي بالتفصيل الممل .
آل انه ابليس دا سجد لربنا سجده مدتها كزا ألف سنه ، و دلوقت ربنا بيطلب منه يسجد لبشر من طين ؟ دي صعبه على واحد عنده أقدميه في العبوديه لله !
دا دفاع تلامزه حبيبك عنه ، القرآن قال حاجه مختلفه تمامآ عن هذا الرفض : (( قَالَ مَا مَنَعَكَ أَلاَّ تَسْجُدَ إِذْ أَمَرْتُكَ قَالَ أَنَاْ خَيْرٌ مِّنْهُ خَلَقْتَنِي مِن نَّارٍ وَخَلَقْتَهُ مِن طِينٍ )) الأعراف 12
أنا خير منه ، خلقتني من نار و خلقته من طين . مش حكايه انو صعب عليه يسجد لحد غير ربنا . حكايه أنا أحسن ، لأ انته احسن ، لعب عيال بقا .

ليه ربنا أمر نبيه انو يدبح ابنه ؟
ربنا حر .
أنبيائه و أولادهم و ذرياتهم ، و الكون بأكمله ، ممتلكات الله الحقيقيه ، هوه وحده اللي خلق الكون ، هوه وحده له الحريه يعمل اللي عايزه ، و مهما عمل ، يبقى عدل ، حتى لو تصور صحفي ملهم عبقري فذ ، زيك كده ، ان الحكايه دي ظلم .
انته مش متفق معايا ان اللي بيتصرف في ملكه ما ظلم ؟ الكون و ما فيه بمن فيه ، ملك الله الواحد القهار ، مش عاجبك ، اشرب ميه البحر !
الم يجد الله وسيله الا الدبح ؟
هوه لو كان خلقك وقتيها كان سألك : ايه رأيك يا هيمه ؟ أعمل أيه ؟ في طريقه تانيه حلوه غير كده ؟ و كنت انته بقا نوّرت العداله الألهيه بثاقب فكرك .
(( ثم ما هو ذنب الولد( اسماعيل ) ))
سيدنا اسماعيل عليه السلام بقا عندك " الولد " ؟؟!!
يا برهوم يا حبيبي ، ربنا يهديك ، اتكلم على قدك .
نبي من أنبياء الله ، بشحطه قلم بقى الولد اسماعيل ؟ ما هي مش بعيده على واحد بينكر ان ربنا عالم و انو واحد لا شريك له ، يخلي الأنبياء " ولاد " كده .
سيدنا اسماعيل ، ما لوش زنب يا روح مامتك ، كل الحكايه درس في التراجيديا و الطاعه ، ربنا قالهولنا علشان نتعلم و نفهم .
((؟ و كيف يطيع الابن اباه هكذا بلا نقاش فى مسألة انهاء حياته بهذه الطريقة الدموية ؟ ))
يا ابني دا نبي ، فاهم يعني ايه نبي ؟ يعني مش صحفي يا روح طنط ، لو صحفي همام زيك كده كان وقف و آل لأ ، أنا مش فرخه تدبحوني كده . دا لم ممكن أبدآ ، و أنا كلمتي ما تنزلش الأرض .
(( والاهم من هذا كله ألم يكن الله على علم أن نبيه سوف يطيع اوامره ، أم أن القصة عبارة عن عرض بين ( الله - ابراهيم - اسماعيل ) حتى يتبع البشر ذات المنهج فى الطاعة بلا نقاش ؟ ))
الله ابراهيم اسماعيل ؟؟؟؟؟؟؟
هو فلم سيما يا ابني ؟
انته بس لو تقول لي ايه اللي مزعلك من ربنا يمكن أريحيك .
لا بجد ايه حكايتك يا ابني ؟ في ايه ؟ مالك ؟
مش تلاقيلك حد على أدك تقل أدبك واياه ، ربنا حته وحده ؟؟؟ مالهم البشر ؟ ما تقل أدبك معاهم ؟ قل أدبك معاي أنا ، مش هازعل منك ، دا انته تحفه ، اللي يزعل منك .... ، مش هقول حمار ، لكن يبقى مش فاهمك .
مش هاسأل دينك ايه و مش شغلي ، بس اتصالح مع ربنا يا ابني الله يهديك . يا ابني دا ربنا عظيم ، رحمته واسعه ، بيقدر يغفر لك كل ذنوبك و لا يبالي ، انته بتقدر تغفر لنفسك انك بتتطاول على اللي خلقك ، بيرزقك و لسا بتعصيه ؟!
يا ابني لو جه عزرائيل ياخد أجلك ، تقدر تقول لو مش جاي ؟ مش عايز ؟ مش النهارده ، تعالى بكره ؟
يا ابني لا تيأس من رحمه الله ، لا ييأس من رحمه الله الا القوم الظالمين ، ما تظلمش نفسك ، كفايه بقا . كفايه بقى مقالات غبيه لا تزال تجرك الى درك لو علمت شدته لقلت يا ليتني كنت ترابا .
تصالح مع الله يا صديقي ، ألله محبه ، الله رحمه ، ألله عدل ، فعله كله عدل ، لو استغفرت الله لوجدته غفورآ رحيما .
أستغفر الله العظيم الذي لا اله الا هو الحي القيوم و أتوب اليه .


عادل امام
" مش الفنان "