|
From : klavier_128@yahoo.com
Sent : Thursday, January 20, 2005 10:27 PM
To : arabtimesnewspaper@hotmail.com
Subject : رد سريع جدا على زياد السلوادي
ياحبيبي ياعيني ياروحي يا زياد حبيت قولك بس انه آخر كام حلقة من الدراسة
تبعيتك اللي حضرتك بتتحفنا فيا كل كام يوم و يوم فيا تخبيص و تخبيص كتير كمان.
أولا: أنا مابعرف ليش هل الإصرار على تحويل آيات كتاب الله العظيم لمجموعة
معادلات وحسابات فيها ثوابت ومجاهيل بتخضع لقواعد و نظريات علمية بحتة منها
الثابت والمتغير, ونحنا بنعرف انه القرآن ثابت وما تغير من 1400 سنة و رح يضل
هيك ليوم القيامة. بقى ممكن أعرف ليش هل الإصرار على تطبيق علم الأرقام
والمعادلات النظرية المتغيرة على كلام الله الثابت الحكيم؟.
وفرضا لو طبقنا هدا الحكي على أي كتاب (أي كتاب كان "ماشرط") وظبتت معنا
المعادلة و طلعت صح يا ترى هل هدا الشي بيثبت إعجاز هدا الكتاب حتى لو
كان من تـاليف البشر.
حسب معادلاتك هدا الشي ممكن يكون صحيح.
تانيا: أنا بعمري ماسمعت بعلم الرياضيات أو أي علم تاني أنه الواحد ممكن يجيب
رقم ويشقلبو من يمينو لشماله وبعدين يجمعلي الرقم الأصلي مع "المقلوب"!!!
لك إيه شو العبقرية هاي لو كان آينشتاين وفيثاغورث وديكارت سمعوا بهيك قاعدة
كانوا كبوا حالن بالبحر من ورا هيك "عبقرية فذة".
ياعيني و ياروحي ممكن تسأل أي طفل صغير بالإبتدائي عن هالشغلة, ورح يقلك إنه أي
رقم بالرياضيات إلو نظيرين واحد جمعي والتاني ضربي الأول بيعطي صفر والتاني
واحد.
إليك المثال التالي "وتأمله"
5+(-5)=0 "النظير أو المقلوب الجمعي"
5*(1/5)=1"النظير أو المقلوب الضربي"
يعني أنا مابعرف من وين إنت جايبلي هالمعادلة العجيبة الي بعمري ماسمعت فيا
إنك إنت عم تجمع الرقم الأصلي مع مقلوبه من اليمين للشمال من وين جبتا هي
مابعرف؟؟؟ و حتى زيدك من الشعر بيت هي مجموعة أرقام و تشاطر بقى ياشاطر.
لاحظ أنه قاعدة "المقلوب الشفتي" الي حضرتك اخترعتها ممكن تتطبق على أي رقم
تاني
غير الأرقام الي طلعت معك نتيجة حساب الآيات.
1222 مقلوبه حسب معادلتك العجيبة هو 2221 و الناتج هو 3443
1525 مقلوبه حسب معادلتك العجيبة هو 5251 و الناتج هو 6776
2614 مقلوبه حسب معادلتك العجيبة هو 4162 و الناتج هو 6776
3254 مقلوبه حسب معادلتك العجيبة هو 4523 و الناتج هو 7777
2345 مقلوبه حسب معادلتك العجيبة هو 5432 و الناتج هو 7777
4545 مقلوبه حسب معادلتك العجيبة هو 5454 و الناتج هو 9999
3636 مقلوبه حسب معادلتك العجيبة هو 6363 و الناتج هو 9999
3443 مقلوبه حسب معادلتك العجيبة هو 3443 و الناتج هو 6886
شوف شوف ياسبحان الله الرقمين الأول والأخير طالعين غير شكل وحتى ضعف بعض
(double)
إيه شو هالإعجاز هاد, فعلا شي خطير!!.
هاي الأرقام اللي شايفها قدامك ممكن تكون نتيجة حساب أي جملة إن كانت بكتاب
مقدس أو كتاب شعر أو نثر حتى, (يعني ممكن تنطبق على أي كلام غير كلام رب
العالمين) يا ترى هل هدا الحساب بيثبت انه بيت الشعر أو جملة النثر فيها
إعجاز و خالية من الأخطاء مع أنه هيه من تأليف البشر الخطائين.
وفرضا مرة تاني و حسب معادلتك العجيبة لو طلع حساب آية معينة هدا الرقم 4778
ومقلوبه هو 8774 و الناتج هو 13552 نلاحظ هنا تخربط الرقم (اليونيك) يعني
العجيب أو المميز فهل هدا يعني عدم اعجاز الآية الكريمة؟؟!
مرة أخرى الرقم 1551 مقلوبه نفسه 1551 و الناتج 3102 نلاحظ أنه الرقم
(unfamiliar)
و شاذ عن القاعدة يا ترى لو كان 1551 ناتج من حساب آية معينة؟ يا ترى شو رح
تكون
النتيجة؟؟؟ هدا لأنه علم الحساب متغير والقرآن محكم و ثابت. والأمثلة
لاتنتهي لأنه علوم الرياضيات والأرقام لاتنتهي.............
يعني علم الأرقام والرياضيات لانهائي و مابيخلص خاضع لقوانين الاحتمالات يعني
بيتحمل
الصح والغلط وماشرط إنه يكون دائما صح أو دائما غلط (Boolean
values,Probability)
وصعب كتير تطبيق العلم الانهائي المتغير على كلام الله الثابت اللي إلو بداية
وألو
نهاية عكس الأرقام الي مالها بداية أو نهاية.
يا عمري يا زياد نحنا العرب مشهورين بتضييع الوقت وكاتب هالسطور ضيع نص ساعة
وهو عم يرد عليك والقرآن الكريم إلو 1400 سنة و مانو ناطر حدا متلي أو متلك أو
متل غيرنا حتى يدافع عنو أو يثبت إعجازه بالأرقام و المعادلات وخلافه.
القرآن الكريم معجز معجز معجز ليس لفصاحته فقط, لكن بسبب إعجازه اللغوي والنحوي
فقط, ولكن لأنه كلام الله المنزه عن كل نقص سبحانه و تعالى وماحدا بيقدر يغيير
فيه ويقول هاي الجملة أحسن من الي قبلها.
أنا ضيعت كتير من وقتي بكتابة هالرد بس كان في إلي هدفين:-
أولا: الدفاع عن عقول القراء و المسلمين البسطاء.
تانيا: أثبات استحالة تطبيق المتغير النظري عل القرآن الثابت.
أخيرا: حبيبي زياد بتمنى إني ما كون دايقتك...بعتذر عن أي كلمة دايقتك أو
زعلتك.
تامر طلال - الكويت
|